قالوها فالقصر ديال الخياط المحرشي فالرباط..قادة البام: مكاينش تعديل حكومي

أكد عضو في المكتب السياسي لحزب الأصالة والمعاصرة، المشارك في الحكومة، في اتصال مع "كود"، أن موضوع التعديل الحكومي نوقش يوم أمس في اللقاء الذي جمع بين المكتب السياسي والبرلمانيين ديال التراكتور.
اللقاء لي كان بالرباط فقصر العربي المحرشي المعروف بخياط الجلالب، حضرو فيه وزراء البام، ونائب الامين العام سمير كودار لي شاد دبا التنظيم والحزب بعد تعيين وهبي فوزارة العدل، وفاطمة الزهراء المنصوري المرأة القوية واحمد اخشيشن، كبار قادة التراكتور، أكدو للبرلمانيين بلي مكاينش تعديل حكومي.
هاد الكلام لي قالو كوادر البام هو نفس الموقف لي عبر عليه الناطق الرسمي باسم الحكومة مصطفى بايتاس، لي وضح بأنه مكاين تعديل حكومي هاد الساعة.
وجرت العادة بلي تيكون التعديل الوزاري كل منتصف ولاية حكومية، وهادشي وقع مع حكومة الفاسي وبنكيران والعثماني، واش غايوقع مع اخنوش، كولشي غادي يبان فاش دوز عامين ونص من العمل الحكومي.