خوان كارلوس خرج منها. المدعي العام طيح كاع التحقيقات واخا مزبلها وها السبب

قرر الادعاء العام الاسباني اليوم اسقاط كاع التحقيقات على ملك اسبانيا الشرفي خوان كارلوس٬ 84 عام. صحابو قالو فقنوات اسبانية بعد القرار باللي يقدر دابا يرجع لبلادو. هاد الشي ما كيعنيش باللي الملك اللي تنحى على العرش لولدو٬ ما دارش التهم اللي كانت توجهات ليه.
خوان كارلوس عندو مخالفات ممكن يتابع عليهم لكن المدعي العام ما حالوش على المحاكمة بسباب قانون سقوط العقوبة بالتقادم وكذلك بسبب الحصانة اللي عندو وقت هاد المخالفات. ف2014 كان مازال ملك.
الملك كان قاد امورو مع الضرائب وخلصهم باثر رجعي. كان خلص 5 مليون اورو ف2021
الملك كان متابع بقضايا بحال اتهامو بتلقيه رشوة من السعودية دفعات ليه لبناء تران فالسعودية بالاضافة الى شي تبرعات وشي حسابات لقاوها عندو وزيد علي هاد الشي شي بطاقة عطاها ليه رجل اعمال مكسيكي وشرا بيها عود ب11 الف اورو
دابا كاين نقاش واش غادي يرجع او يبقى فابو ظبي. القرار ماشي غير بيدو هو. القرار بيد ولدو الملك فيليبي السادس. العلاقة بيناتهم ماشي حتى لهيه