اسبانيا : الجالية المغربية ف ألكالا لا ريال دارو مسيرة سلمية وطالبو بالعدالة للمراهقة المغربية اللي قتلها شاب من أمريكا اللاتينية

albayancom0@gmail.com
قال موقع "Alcalá la Real Información"، أن الجالية المغربية فبلدية ألكالا لا ريال دارو مسيرة سلمية، السبت الفايت، وطالبو بالعدالة للمراهقة المغربية (14 سنة) اللي قتلها شاب من أمريكا اللاتينية، الثلاثاء الفايت، وتلقات الجثة ديالها حدا كنيسة مهجورة. وأكد أقارب الضحية أن جثمانها غادي يمشي للمغرب هاذ السيمانة باش تدفن ف منطقة حدا بني ملال.
وذكر موقع "دياريو خاين" الإسباني أن، البوليس ف بلدية خاين شدو شاب من أمريكا اللاتينية عندو 22 عام بسباب الاشتباه في قتل مراهقة من أصل مغربي عندها 14 عام ف بلدية ألكالا لا ريال. التقارير الأمنية كترجح وفاة الضحية بسباب الاختناق حد الموت بسبب ممارسة العنف الجنسي ضدها .
وجرات الأحداث ف محيط كنيسة والمتهم براسو هو اللي اتصل برقم الطوارىء 112 وخبرهم بالجريمة. البوليس والحرس المدني والوقاية المدنية لقاو الضحية عريانة حدا الدروج حسب بلاغ للسلطة القضائية. ودابا التحريات غادي تركز على البيئة الأقرب للقاصر والقاتل المزعوم لتحديد ما إذا كان علاقة عاطفية بين الاثنين.