واش ما عندكمش شي حد بعقلو. گاليك "اوميكرون" صنع في المغرب. كونو تحشمو. بحال الى المغرب رجع معمل ديال المتحورات والطفرات

70 دولة فالعالم لقات المتحور الجنوب الافريقي الجديد اوميكرون وحتى وحده فيهم ما قالت حقه ما حقه هدا متحور محلي تحور عندنا وماجاناش من دوله اخرى... وكلهم قالو ها فين لقيناه وها شكون جابو واخا ما سدينش الحدود ديالهم. ووزارة الصحة عندنا لقات اول حاله مصابة باوميكرون فكازا والبلاد مسدودة هادي ثلاثه دالسيمانات ومنين ماعرفوش كيف يتبعوها بحال الدول اخرين قاليك را اوميكرون تحور عندنا.
هادي فضيحة غاتجيب لينا الشوهة والدول مابقاش تيق فينا وفكلامنا وفمعطياتنا... الخبراء فعلم الفيروسات كيقولو باللي الاحتمال ديال ظهور جوج متحورات بحال بحال وفيهم كثر من خمسين طفرة بحال بحال هو احتمال منعدم تماما... اوميكرون براسو باقين العلماء كيقلبو كيفاش جمع كل هاد الطفرات ... ومن المستحيل علميا شي متحور اخر يكون بحالو تماما ... هاد الشي غادي يبان فالتتبع الجيني ديال اوميكرون لي تلقا فالمغرب.
الصحة العالمية والخبراء فالعالم ماغاديش يخليو هاد القضية دوز بلا ما يفهمو اش واقع واخا الامور باينة من الناحيه العلمية.
للي وقع ان الفرق ديال وزارة الصحة ماقدرتش توصل لكيفاش دخل اوميكرون المغرب ووصل لعند السيده فكازا .. خصها تزيد تبحث ...ولكن الوزارة مرضاتش يدوز اوميكرون من حداها والحدود مسدوده ودول اخرى فاتحين الحدود وعرفو منين جاهم اوميكرون.
دابا الفضيحه هي الشوهه العلمية وزيد عليها بحال الى حنا المغرب ولينا معمل ديال المتحورات وخاص العالم يرد البال منا فالوقت اللي فالواقع حنا من الدول الآمنة وبائيا...
وا أعضاء اللجنة العلمية... أليس بينكم راجل بعقلو كيقول هدا راه تخربيق؟؟؟