بالفيديو. شيفور طاكسي فأكَادير لقى 50 مليون وردها لمولاها

واحد شيفور ديال طاكسي صغير فمدينة أكَادير، لقى صاك فيه مبلغ مالي كبير يقدر ب50 مليون سنتيم فالشارع العام حدا شي مؤسسة تعليمية، واللي تبين أن شي واحد نسى الصاك تما أو طاح ليه وماردش البال.
الشيفور بعدما لقا ديك "البركة"، خلاها عندو وبدا كيقلب وكيسول على مولاها، خصوصا وأنه لقى بعض الوثائق ديالو فنفس الصاك، وفعلا مشى لعندو وتلاقاه ورجع ليه الصاك، وفي المقابل و اعترافا من "مول 50 مليون" بالجيست الزوين اللي دار هاد الشيفور (سميتو حسن)، عطاه 3 دالمليون كادو، خصوصا وأنه ماتوقعش أن فلوسو غترجع ليه وكان كيظن أنها مشات.
هاد الخبار دار ضجة بعدما تم تداولو وناضو عدد من الناس كيقولو بللي "هادشي كلو كذوب و بأن جمعية مهنية ديال الشيفورات وصحاب الطاكسيات الصغيرة فمدينة أكَادير، بغات غير تدير البوز بواسطة هاد الخبار"، الشي اللي خلا نفس الجمعية تخرج فيديو مع الشيفور حسن كيهضر فيه على أشنو وقع بالضبط.
https://www.facebook.com/appta.officiel/videos/4727861743959530/?sfnsn=mo