فحوار حصري مع "كود". اخنوش: ورا 8 شتنبر ما غادي يكون غير الخير وتوظفات اساليب ماشي ديال اولاد الناس باش توقف دينامية حزبنا وقوتنا فشفافيتنا مع لمغاربة للي تاقو فينا

فحوار حصري مع "كود" هدر عزيز اخنوش رئيس التجمع الوطني للاحرار على مواضيع كثيرة. بعضها كتهم سياسية التواصل فهاد الحملة الانتخابية وبعضها كيهم رهان حزبو فالانتخابات التشريعية والبلدية ل8 شتنبر.
حوار هدر فيه بلا دوران. تكلم على مغرب ما بعد 8 شتنبر. جبد مواضيع اخرى نخليكم تكتشفوها فهاد الحوار مع "كود".
"كود": فين غبرتي؟
اخنوش: موجود دائما في الميدان ورفقة مناضلات ومناضلي التجمع الوطني للأحرار، ورفقة المغاربة اللي حنا ديما قراب منهم من خلال جميع الأنشطة والجولات اللي كنديرو فالميدان، واللي ولات بصمة ديال الحزب.
وأنا كذلك موجود على مواقع التواصل الاجتماعي، والمواقع الرسمية أيضا، اللي كنعتبرها وسائل كتسمح ليا نتواصل بشكل مستمر ومباشر.
وإيلا كانت زعما هاد الملاحظة اللي درتي خاصة بالخرجات التلفزية والإذاعية وعلى المواقع الالكترونية، فأنا كنعتبر راسي واخد حقي وكنقوم بخرجات عديدة، في الحدود اللي كتسمح بيها الأجندة ديالي ما بين العمل الميداني والأنشطة الحزبية والتنسيق مع الأعضاء.
وإيلا كنتي كتسولني مقارنة بناس آخرين كيديرو خرجات كثيرة، فمكرهتكش نتا تسولهوم هوما كي كيديرو.
زيد على هادشي أنني سواء فالعمل الحكومي أو الحزبي، ديما كنفكر بروح الفريق.
التواصل ماشي ديما كيكون عبر الوزير أو رئيس الحزب، ولكن عبر جميع القوى الحية اللي كتواجد فيهم، المهم هو المعلومة توصل.
وبالنسبة للحزب على الخصوص، فهو موجود من خلال مجموعة من القيادات والشباب والنساء اللي متواجدين واللي كيمثلوا أحسن تمثيل الحزب في جميع المواقع، وخاصة في الإعلام. الأهم نشوفو شحال قدمنا ديال الوجوه الجديدة، وشحال عطينا الكلمة لناس مكانوش كيتسمعو من قبل.
"كود": حزبكم ربح انتخابات الغرف المهنية والمفاجأة أنكم ما عبرتوش حتى على الفرحة ديالكم بهاد الفوز لكبير. علاش؟ واش ما بغيتوش تخلعو الخصوم السياسيين؟
اخنوش: بالعكس نوهنا بالنتائج من خلال بيان رسمي للحزب، ومن خلال عدد من الخرجات الإعلامية.
حنا حزب اللي عندو طموحات مشروعة في أنه يتموقع فأحسن المراتب، نتائج الانتخابات المهنية هي نتائج مشجعة وكدل على أن للحزب جاذبية لدى الناخبين.
وداخل الحزب مكنفكروش بمنطق الرابح والخاسر، بل منطق التوافقات والمصلحة، باش نقدرو نشكلو تمثيليات اللي تقدر تخدم على أكمل وجه.
داكشي علاش ملي خرجو النتائج، علنا الانفتاح ديالنا على باقي المكونات السياسية، من أجل التعاون والعمل المشترك.
منساوش أنه باقي تابعينا، استحقاقات أخرى مهمة سواء على المستوى التشريعي أو الجماعي والجهوي، وخصنا نواصلو العمل باش نحققو نتائج على أحسن مستوى.
خاصة أن هاد الاستحقاقات كتمتل فئة مختلفة، وكتطلب عمل ومقاربة أخرى.
"كود": 5 أحزاب منها حزب ما كانش غادي يكون ليه وجود كون ما دخلتوهش للحكومة، دارو بيان ضد حزبكم بلا ما يسميوه. كيفاش تلقيتو هاد البيان؟ وواش غادي يكون عندها تأثير على تحالفاتكم بعد 8 شتنبر ايلا جيتو اللولين؟
اخنوش: مشفناش شي بيان موقع ورسمي، شفنا واحد الوثيقة كدور، ومكنعتبروش أنها كتعنينا.
والحديث على التحالفات سابق على أوانو فهاد المرحلة، اللي المهم فيها هو يدوزو هاد الاستحقاقات على أحسن وجه، وبلادنا تعطي نموذج كيرسخ أنها استثناء في المنطقة.
مع النتائج، غادي نعطيو موقفنا من التحالفات، بالشكل اللي كيتماشى مع قناعاتنا.
وملي غتخرج النتائج، غادي نتعاملو كما تقتضي التقاليد والأصول، وغندخلو فحوارات مع الشركاء باش نلقاو صيغة كتماشى مع قناعتنا، ونتبادلو الآراء.
"كود": اختاريتو الترشح للانتخابات البلدية فأكادير وما بغيتوش تترشحو للانتخابات التشريعية. علاش هاد الاختيار؟
اخنوش: هاديك المدينة عندي بيها ارتباط كبير، سواء على المستوى الشخصي أو السياسي. أنا ولد المدينة، وعائلتي من المنطقة، وفيها تحملت مسؤولية رئاسة الجهة.
الحال ديالها ما كيعجب تا واحد، والتنمية فيها تعطلات بشكل كبير.
كواحد من ولاد هاد المدينة، وغيور عليها، قررت نتقدم بلائحة من الفعاليات من مجالات الثقافة والاقتصاد والرياضة والمجتمع المدني، كيحركهم دافع تقديم الأفضل لأكادير. الترافع على المدينة من الميدان هو مسألة أساسية بالنسبة ليا.
"كود": كتوقعو تربحو انتخابات 8 شتنبر التشريعية؟
اخنوش: قمنا بعمل كبير خلال السنوات الماضية. وبشهادة الجميع، حنا اللي حاضرين هادي 5 سنين.
وملي شافو ديك الخدمة كولها، قالو حنا أرانب سباق، وما غنكملوش، وما عدناش النفس الطويل، وأننا دكان سياسي، الخ..
وهاهوما شافو اليوم بأننا لا زلنا حاضرين في الميدان، وخدامين بنفس الوتيرة.
دينامية كبيرة بزاف وفجميع الجهات، خلات الحزب قوي وحاضر بقوة وعندو جاذبية عند المواطنين.
كنا مع المواطنين قراب منهم من خلال عدة برامج وجولات، ولقاءات اللي متأتراتش بكورونا على سبيل المثال، وتكيفنا مع الوضع وجددنا قدراتنا التنظيمية من خلال تسخير التكنولوجيا خدمة لمواصلة هاد الدينامية.
توجنا هاد العمل الجبار اللي كولو كان مبني على الاستماع بمسار الثقة ومسار المدن وببرنامج قدمناه قبل ب 100 يوم من الحملة الانتخابية، باش المواطن ياخد وقتو ويقراه مزيان.
وبكل موضوعية كنعتقد أن هاد العمل اللي تقدم فهاد 5 سنوات الأخيرة، لأول مرة تدار فتاريخ السياسة فالمغرب.
كنظن أننا قمنا بعمل استثنائي كحزب نشط وقريب من المواطن، وواثقين فأن المغاربة غادي يميزو بين اللي كان قريب منه طيلة أيام السنة، وبين اللي كيجي فاللحظة الأخيرة باش يحاول يركب على مجهودات الغير.
"كود": تلقيتو ضربات كثيرة من جهات مختلفة، اشناهو السر باش ماشي غير بقيتي واقف بل تقويتي سياسيا وخلى حزبك يربح انتخابات الغرف المهنية؟
اخنوش: السر هو العمل وعدم الالتفات للوراء.
حملات تضيليلة وفايك نيوز، وتسخير موارد باش يحاربوني ويحاربو الحزب، وتا العمل القطاعي، ولو يكون الثمن ديالها هو توقيف مجهودات التنمية وضرب مصالح المواطن.
قلنا أننا غنبقاو واقفين منذ بدء تلك الضربات، وراحنا بقينا واقفين وجنب إلى جنب مع المواطنين.
أساليب ماشي ديال ولاد الناس، اللي ما يمكنش تصورها توظفات باش نوقفو هاد الدينامية، وضرب تحت الحزام على مدار السنة.
كان عندنا قناعة من اللول أن مشروعنا غادي يقلق هادوك اللي ولفو يكدبو على المغاربة، ويمررو المغالطات، كنا مستعدين لهاد الضربات والهجمات. بهاد الضربات ديالهم عاونونا، والمواطن ولى متبعنا ومهتم بينا.
فئات عريضة من المواطنين تاقت فينا، والتحقات بهاد المشروع، ملي البرنامج ديالك كيوصل للمواطن، كنظن مكيبقاش مهم تعطي أهمية لهاد الهجمات.
كنا شفافين من الأول، وكنقولو هو اللي كنديرو. ماعمرنا خبينا شي حاجة على المغاربة.
حاولو يقصيونا بجميع الطرق ويبعدو المغاربة في ولوج العمل السياسي، ولكن صبرنا، من أجل المغاربة، ومن أجل تقديم مشروع سياسي يليق بهم.
"كود": اش من مغرب كتتمنى بعد 8 شتنبر؟
اخنوش: المغرب بلد عظيم، كيقودو ملك عظيم سيدنا الله ينصرو.
عطى بزاف لهاد البلاد، وكيقدم يوميا للمغرب الكثير والكثير.
محظوظين بيه كمغاربة، والأكيد أنه كنتمنى للمغرب المزيد من التقدم والازدهار تحت قيادة سيدنا الله ينصرو.
بغيت نشوف بلادنا في أعلى المراتب، بزاف د الأمور خاصها تصلح، التعليم والشغل والصحة أولويات عبرو عليها المغاربة صراحة وعلانية، لازم ما نخدمو عليها، ونوجدو لولادنا مغرب أفضل.
من بعد 8 شتنبر، الأولوية هي الخروج من هاد الأزمة اللي دارتها تبعات الجائحة، محتاجين حكومة جريئة وصريحة مع المغاربة، ولتدابير فورية، محتاجين اللي يعمل بزاف ويقلل من الكلام ومن الشعبوية.
وبالتوازي مع ضرورة اتخاذ تدابير فورية للخروج من تداعيات الجائحة.
فمخاصش تكون الخسارة خسارتين ونهدرو زمن التنمية، نقدرو نديرو بزاف د الحوايج لا كنا منضمين.
وداكشي علاش كنقولو أنه فالخمس سنوات اللي جاية، غادي نعطيو أولويات لقطاعات اللي مخاصش تسنى لأنها كتستثمر فالعنصر البشري اللي هو أساس تنمية غدا، وكتقيس حاجيات مستعجلة ومهمة عند الناس، وميمكنش بلد عظيم بحال المغرب وبهاد المؤهلات، يكون عندو تعثر فهاد المجالات.
هاد الاعتبارات كولها درناها قدام عينينا وحنا كنصاوبو البرنامج، وباش نجاوب على سؤالك هاد البرنامج كيبين أش بغينا للمغرب ورا 8 شتنبر، وراه ما غادي يكون غير الخير.