سوفيان بوفال: وقفت المدرسة وانا صغير باش نعاون مي.. وموهبة كورة فيا من الصغر كنظن انها فطرية

عبر اللاعب الدولي المغرب، سفيان بوفال، على استعدادو ذهنيا وبدنية لهذ الموسم الكروي الجديد، واخا دوز موسم صعيب كلو إصابات.
وعرف نجم خط الوسط لنادي Angers SCO، فابريل اللي فات، إصابة على مستوى الركبة ديالو، شي اللي دفعو يمشي يتعالج برا النادي.
وقال بوفال، فمقابلة مع SoFoot، أنه فرحان حيت استرجع اللياقة البدنية ديالو، وبدا الموسم بتسجيل هدف.
وفمشاكل الموسم اللي فات، بخلاف الإصابات المتكررة، كانت عند بوفال رغبة فالرحيل عن Southampton، واخا النادي كان باغي يخليه، حيت كان باغي تحدي جديد، وكان باغي يتدرب بشكل منفصل، هذشي علاش سينا مع Angers، واخا كانت فترة الانتقالات صعيبة مع "كوفيد".
واضاف بوفال فالمقابلة: "وقفت القراية بكري باش نعاون الام ديالي ونلعب غير كرة.. وملي كنت صغير، كنت كنقدر نراوغ وكانت عندي هذ الموهبة، وكنت كنعتبرها فيا فطرية، ماعمرني قدرت حتى نشرحها، ويمكن لصحابي يشهدو على هذشي، الحوايج لي درتها فاش كانت فعمري 5 سنين هي نفسها لي كاندير دابا وأنا محترف، ولكن كان عندي مشاكل نمو كبيرة خلات رجلي تثقال، وفنفس الوقت نفس هاد المشاكل عاوناتني بشكل أساسي".
ورجع بوفال لAngers من بعد ما تبدل المدرب ستيفان مولان، واللاعب مابغاش يدير مقارنة مع المدرب الجديد جيرار باتريك والقديم، حتى يعطي للجديد فرصة يبين القدرات اللي عندو.
https://www.sofoot.com/sofiane-boufal-j-ai-du-arreter-l-ecole-tres-tot-pour-aider-ma-mere-503160.html