جمعيات طب الاطفال كتوصي على أهمية تلقيح الفئة بين 12 و17 لعام: هذشي غيحميهم ويضمن دخول مدرسي حضوري آمن والفاكسانات بينات فعاليتها على الوليدات الصغار

الجمعية المغربية لطب الأطفال، وجمعية أمراض الأطفال المعدية وعلم التلقيح "سوميبيف"، و"أنفوفاك المغرب"، كياكدو كاملين على أهمية التلقيح ضد فيروس كورونا المستجد بالنسبة للأطفال بين 12 و17 لعام، وهذشي باش يتضمن ليهم دخول مدرسي مأمن.
وحسب بلاغ مشترك للجمعيات، فهذ التلقيح غيحمي المحيط ديال هذ الأطفال، ويقيهم من الحالات الصعبة ومخاطر الدخول للمستشفى، كيف أن التلقيح الموسع غادي يضمن ويسهل العودة للحياة الطبيعية.
وزادت الجمعيات ان التلقيحات المخصصة من طرف اللجنة العلمية ديال التلقيح هوما "فايزر" و"سينوفارم"، وهذ الفاكسانات بينو على الفعالية ديالهم عند الأطفال فالعالم بأسره، والواليدين عندهم الاختيار بين ليفاكسان بجوج.
وقالت أن مراكز غايكونو مخصصين لهذ الفئة العمرية، والاطفال خاص يكونو مع الآباء ديالهم. وغتدار خطة وقائية باش يكون تتبع لهذ الأطفال اللي خداو الفاكسان.
الفاكسيناسيون، حسب الجمعيات، غتسهل الدخول المدرسي الحضوري، وغتجنب التأثير السلبي ديال الحجر على الوليدات الصغار صحيا وذهنيا.