حالة نادرة من حساسية ديال الما.. بنت حتى دموعها كيحرقوها وكتحس بحال العافية شاعلة فيها

كتعاني بنت ميريكانية من حالة مرضية نادرة، وهي حساسية ديال الما، لدرجة أنها إذا بكات الدموع كتشدها الحساسية وكتولي تتألم بزاف.
وقالت "نيا سيلواي" (Niah Selway) اللي عندها 23 عام أنها كتعاني من حالة نادرة سميتها "Aquagenic Pruritus"، اللي هي "الحكة المائية".
البنت إذا قاسها الما كتحس لساعات بحال إيلا مشلولة وفي نفس الوقت بالحريق مع العيا.
"نيا" تكرفسات مع هاد الحالة ودابا بقات بلا خدمة ودوزات مراهقة صعيبة بلا قياس.
وقالت "إيلا دوشت مكنحس بوالو في الأول لكن من بعد 10 دقايق كنحس بالعافية شاعلة في لحمي وبحالا كنتحرق وهاد الإحساس كيبقى لمدة 3 ساعات".
قصتها ولات كتعرف شويا ب شويا، بعدما بدات كتشاركها عبر مواقع التواصل الاجتماعي، وخصوصا ف لاشين ديالها على "يوتوب" اللي وصلو متابعينها لأكثر من 150 ألف مؤخرا، وفيها كتهضر على حياتها و أيضا على هاد الحالة المرضية النادرة.