كيعاودو نفس الأخطاء.. تحالف أحزاب G5 لعزل البي جي دي بجهة درعة كيعطيو فرصة للشوباني يعاود ولاية ثانية فرئاسة مجلس الجهة

جهة درعة تافيلالت اللي عاشت البلوكاج، وشد لي نقطع لي بين المعارضة ومكتب المجلس اللي كيسيرو البي جي دي من جهة، وبين الوالي بوشعيب يحظيه ورئيس المجلس الحبيب الشوباني، باقي كتعيش نفس الممارسات اللي تسبب فالبلوكاج التنموي بالجهة، بحيث اتفقت 5 أحزاب على عزل البي جي دي في التحالفات المقبلة.
وحسب مصادر حزبية ل"كود" فإن "الحركة الشعبية بجهة درعة، الحزب الوحيد اللي رفض يدخل لهاد البلوكاج واختار الحياد وطالب ديما يكون التوافق، عكس الأحزاب الخمسة (الأحرار، البام، الاتحاد، البي بي اس، الاستقلال) اللي ختارو يكونو جزء من البلوكاج".
هاد التحالف ديال G5، كيخدم البي جي دي كثر، حيث العزلة اللي دايرين ليه غاتزيد تنفعو فهاد الجهة اللي باقي كتعاني من التهميش ومن ضعف التنمية وغياب التجهيزات الطبية والطرق.
الحبيب الشوباني القيادي فالبي جي دي لقا الفرصة فهاد التحالف، ودار بلاغ كيرد عليهم بلي حصيلتو كانت ايجابية، وأن حصيلة منتخبي هاد الاحزاب الخمسة بمجلس الجهة كانت ضعيفة، وانهم وراء البلوكاج وو.
الشوباني قال فالبيان :"بناء على الحصيلة الكارثية لمكونات تجمع G5 الموقع على البيان المشترك، ذات الصلة بهذه الحصيلة الثقيلة في عرقلة عمل المجلس، وحرمان الساكنة في كل أقاليم الجهة من العديد من المشاريع والميزانيات المرصودة للنهوض بأوضاعهم الاقتصادية والاجتماعية والرياضية والثقافية والبيئية".