سابقة فوزارة الخارجية. عصيان ضد بوريطة. وزارة بلا كاتب عام واخا معينة وموظفين حرثو فالجايحة وتحرمو من العطل وورك عليهم دابا

ناصر بوريطة وزير الخارجية والتعاون غادي يدخل للتاريخ ماشي بانجازاتو. فالحقيقة ما عندو غير انو رجع الخارجية ثكنة عسكرية. لغة حربية بدل لغة ديبلوماسية وتدبير كارثي لجيش الديبلوماسيين.
بعد ايام من رسالتو اللي هان فيها الناس اللي خدامين فالخارجية فالخارج قبل الداخل وفيها باللي ما كاين عطل واللي سبق واستافد يجمع راسو ووو٬ بدات حركة احتجاج صامتة باعلان موظفي البعثات القنصلية والديبلوماسية خوض اضراب برا لمواجهة قرار بوريطة اللي حرمهم ماشي غير من العطل بل حتى من السبت والاحد.
ما كاينش شي جهة معينة فدولة معينة فيها البعثة القنصلية والديبلوماسية المغربية دعات لهاد الاضراب ولكن كاين تدمر بين الموظفين والقناصلة وحتى السفرا من قرار بوريطة. واخا هاد الناس ما عندهمش نقابات ناضو كيحتجو. هادي بوحدها راها سابقة.
بوريطة اللي ما عمرو كان سفير باش يفهم هاد الشي كيهمو غير صورتو. الكاتبة العامة مونية بوستة معينة هادي قرن وزمارة ومازال ما بداتش الخدمة. حجة بوريطة خاص القسم والاستقبال الملكي. المهم لقى راحتو وصافي باش يخرج عقدو فناس الخارجية حتى خرجو ليه من الجنب.