سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
واش كاين شي عاقل فالدولة يوقف عبث "قضية البكوري". كيفاش منع مسؤول من السفر وبعد 10 ايام ما فراسو لا هو ولا غيرو السبب وعلاش منظمات حقوق الانسان كلها ما تتضامنش معاه
دابا دازت 10 ايام على قرار شفوي ديال منع مصطفى البكوري اللي كيشغل رئيس جهة الدارالبيضاء الكبرى ورئيس ورئيس الوكالة الوطنية للطاقة الشمسية "مازن" باش يركب فطيارة من مطار محمد الخامس فكازا كانت غادية لدبي الاماراتية. قلنا القرار شفوي حقاش باش بغى يدوز خبروه باللي ممنوع من السفر وصافي. المغرب عندو دستور 2011 وعندو قوانين كتحمي المواطن كيفما كان. دولة الحق والقانون كتأسس بقرارات معللة فقضايا بحال هادي ماشي قرارات شفوية. حسب ما علمته "كود" لحد الان ما زال لا البكوري ولا عائلتو عارفين السبب. النيابة العامة اللي جاها رئيس جديد فالمغرب كان عليها تخرج بيان توضح فيه كلشي. الى كان التحقيق يستدعي السرية يقولوها. هذا ماشي اي شخص. هذا رئيس مؤسسة استراتيجية للدولة المغربية وفيها شركاء عالميين. يعني سمعة المغرب هادي حقوقيا. قرار بحال اللي وقع ليه كيخلي المتعاملين الدوليين مع "مازن" يفقدو الثقة فالبلاد فالاستثمار. هاد الفيلم كولو كان يقدر يسالي ببيان رسمي. بيان يكفي على الاقل اغلاق مجال التأويلات. راه بنادم تقول ليه ندخلك للحبس على تخليه معلق عشرة ايام. هادوك اللي كانو يتاصلو بيه يسدو عليه وعائلتو كتخلص الثمن وحتى صحتو تقدر تكون عندها تبعات خايبة. فقضايا مختلفة كتنوض جمعيات حقوقية كتحيح على الدولة دابا مع المواطن مصطفى البكوري سكتو. يعني ان هاد الجمعيات ماشي ديال حقوق الانسان بل ديال الدفاع على الانسان اليساري او الانسان الاسلامي اما الانسان المغربي فما كيهمهمش. حزبو غاسلين عليه يدينا حقاش ما عمرو دافع الا على الفاسدين فالحزب. هاد الحزب الهجين اللي تجمع فيه اليساري الانقلابي مع الاعيان الانتهازيين ودردرو بفئات اخرى٬ ما قدرش يحل فمو فهاد القضية. سكت. ضرب الطم. باستثناء وهبي اللي كيف ما كتبات "كود" اتصل بالبكوري٬ فلخراين خايفين من قضية حتى حد لحد الان ما عارفها اش هي بالضبط خاص هاد القضية تفهم. ايلى كان شي ملف عليه يتعلن. ايلى كانت شي قضية غادية تحل يخبرونا واخا غير سطر. الاستمرار فهاد الاسلوب راه كيضر بسمعة بلاد قبل ما يقدر يدمر عائلة
