تأجيل محاكمة الراضي واستيتو ل27 ابريل.. ومحاميه ل"كود": تأخرات لإعداد الدفاع والمشتكية ماجاتش

قررات غرفة الجناية الابتدائية بمحكمة الاستئناف فكازا تأخير جلسة محاكمة الصحافيين عمر الراضي وعماد ستيتو حتى ل27 من هذ الشهر.
هذ القرار خداتو المحكمة، فالجلسة الأولى دمحاكمة الراضي، باش تعطي مهلة للدفاعوالنيابة العامة للاطلاع على الملف، وإعداد الدفوعات الشكلية المناسبة.
وفتصريح محامي الراضي ل"كود"، فالمحاكمة دازت فاجواء عادية جدا، مع حضور المتهمين معاودفاعهما، فيحين غابت المطالبة بالحق المدني، لكن حضرات المحامية ديالها، فاطمة الزهراء الإبراهيمي.
والراضي متابع بتهم "تلقي اموال من جهات أجنبية بغاية المساس بسلامة الدولة الداخلية، ومباشرة اتصالات مع عملاء دولة أجنبية بغاية الإضرار بالوضع الدبلوماسي للمغرب"، بالإضافة لتهمة "هتك العرض"، اما استيتو فمتابع ب"المشاركة" فالتهمة الثانية.
وتزامنا مع أولى جلسات محاكمتهما، كانت وقفة احتجاجية للتضامن مع الصحافيين، اللي مازال متمسكين بالبراءة ديالهم، ونافيين التهم المنسوبة ليهم.