8 مارس. عيالات كَادات: گود جابت أبرز 16 نساء بينو على قوة المرا وكفاءتها فمجالات مختلفة.. فالحكومة والسياسة والذكاء الاصطناعي والسبور والفن ومجال المال والأعمال – الجزء الثاني

تخليدا لليوم العالمي لحقوق المرأة، اللي كيصادف 8 مارس من كل عام، "كود" اختارت أكثر 16 امرأة ناجحة فمجالات مختلفة، واللي قدرات تبين أن النساء قادرات يعطيو فمجالات مختلفة، سياسية، ديبلوماسية، فمجال المال والأعمال، الفن، وحتى الرياضة والذكاء الاصطناعي.
فالجزء الثاني من هذ الورقة، "كود" جابت ليكم 8 وجوه نسائية معروفة ومرموقة، حققات نجاحات على أصعدة ومستويات متنوعة، وكانت مفخرة وشرف كبير للمغرب وطنيا ودوليا.
لطيفة أخرباش.. هدفها تحقيق التمثيلية الوازنة للنساء
وضعات لطيفة أخرباش، الرئيسة جديدة للهيئة العليا للاتصال السمعي البصري، قضية المرأة نصب أعينها منذ تعيينها على رأس هذ الهيئة من طرف الملك محمد السادس، من خلال تقارير وإحصائيات لتقييم تمثيلية النساء فالإعلام الرسمي.
وخلال أزمة "كوفيد 19′′، شافت أخرباش أن غير بين 8 فالمية و15 فالمية هي النسبة الإجمالية المخصصة لمداخلات النساء من الشخصيات العمومية فالمجلات ونشرات الأخبار، وهذشي علاش قررات رئيسة الهيئة تتبع تمثيلية النساء، وتحرص على النهوض بثقافة المساواة والمناصفة فالإعلام العمومي، وضمان التعبير التعددي.
أخرباش، الحاصلة على الدكتوراه فعلوم الإعلام والاتصال من جامعة باريس 2 عام 1988، كانت خدمات فمجال التدريس والبحث فالإعلام والاتصال لأكثر من 20 سنة، وتولات منصب مديرة المعهد العالي للإعلام والاتصال من شتنبر 2003 حتى لمارس 2007، وفمارس من نفس العام تعيينات أخرباش مديرة للإذاعة المغربية.
وكان سبق لأخرباش توشحات بوسام جوقة الشرف الفرنسي من درجة فارس، وخدات منصب كاتبة الدولة لدى وزير الشؤون الخارجية والتعاون في حكومة عباس الفاسي الفهري بين أكتوبر 2007 ويناير 2012.
ف2013 عينها الملك محمد السادس كسفيرة للمغرب فبلغاريا ومقدونيا، وف2016 كسفيرة للمغرب فتونس، قبل ما تولي رئيسة ل"الهاكا" من اللخر ديال 2018.
كريمة بنيعيش.. ديبلوماسية عززت روابط الرباط بمدريد
سفيرة المغرب باسبانيا، كريمة بنيعيش، كان ليها فضل كبير فتحسين العلاقات المتوثرة بين الرباط ومدريد، بحكمتها وتبصرها، واخا السياق اللي تقلدات فيه هذ المنصب كان مشحون بمشاكل الهجرة غير المسبوقة، وتزامن كذلك مع تشييد سياج طويل بجانب سور سبتة.
السفيرة المغربية، ذات 58عام ، ماكانتش هذي أول مهمة ديبلوماسية تتقلدها، بحيث سبق ليها تعينات ف2008 كسفيرة للمغرب فالبرتغال، واشتغلات، من 2013، فمنصب نائبة رئيس اللجنة التنفيذية لمركز شمال-جنوب التابع لمجلس أوروبا، كيف شغلات منصب مديرة التعاون الثقافي والعلمي بوزارة الشؤون الخارجية والتعاون الدولي، بالإضافة لمجموعة من المهام الأخرى.
وبنعيش مشهود ليها بالكفاءة والمهنية فالأوساط الخارجية المغربية كيف الإسبانية، بفضل حسن تدبيرها للملفات الشائكة اللي كتهم البلدين، مع نظيرها ريكاردو دييز هوشلايتنر.
وبنيعيش هي بنت الطبيب الشخصي السابق للملك الراحل الحسن الثانية، حاصلة على دكتوراه شرفية من جامعة نوفا بلشبونة (2013)، وعلى الباكلوريا فالعلوم الاقتصادية بالرباط سنة 1981، وعلى الإجازة فالعلوم الاقتصادية من جامعة مونريال سنة 1986، وعلى شهادة "ميتريز" في العلوم الاقتصادية من جامعة مونريال سنة 1988.
وتم توشيح بنيعيش بمجموعة من الأوسمة من بينها قائد الاستحقاق المدني فإسبانيا عام 2000، ووسام الاستحقاق الوطني ففرنسا عام 2007، وهي رئيسة وعضو بالعديد من الجمعيات التي تعنى بالطفولة والمرأة والثقافة فالمغرب وإسبانيا.
نبيلة الرميلي.. عتقات كازا من الجايحة
شهد ليها العدو قبل الصديق بنجاحها فتدبير أزمة كورونا فجهة كازا سطات، من بعد ما كانت الجهة، وخصوصا مدينة كازا، كتسجل بين 1000 حتى ل1500 إصابة فاليوم، المياه رجعات لمجاريها دابا، وماتفجراتش الوضعية الوبائية كيف سبق ووقع فمراكش وفطنجة، اللي ماتو فيهم ناس بزاف، وهذشي واخا جهة كازا سطات هي الجهة الأولى فالمغرب على مستوى التعداد السكاني.
هي نبيلة الرميلي، المديرة الجهوية للصحة فكازا سطات، والنائبة العاشرة لعمدة الدار البيضاء عن مجلس مقاطعة سباتة، واللي نجحات فتدبير الجايحة، كيف قالت فتصريحات متطابقة ليها لمنابر إعلامية، انها خدمات كثر على تعزيز تقاط الكشف وتقويتها، وتكثير عدد التحاليل، والتركيز على الفئات الهشة من المرضى والمسنين.
الرميلي، اللي هي كذلك عضوة بالمكتب السياسي للتجمع الوطني للأحرار، سبق ليها اشتغلات كمسؤولة فمجال الصحة فكازا، وعندها دراية كبيرة بالقطاع فالعاصمة الاقتصادية، بحيث سبق لها خدمات كطبيبة ومسؤولة بمستشفى مولاي يوسف، قبل ما تتعين مندوبة للوزارة بعمالة مقاطعات بنمسيك، ومن موراها فعمالة مقاطعات آنفا اللي مارسات فيها مهامها حتى ولات مسؤولة على الجهة كلها.
اسمهان الوافي.. خبيرة مغربية في منصب مسؤول ف"الفاو"
كتعتبر اسمهان الوافي وحدة من بين العيالات المغربية اللي قدرو يحققو نجاحات متوالية فمسارهم المهني، الوافي هي من النساء الرائدات فمجال علم وراثة النباتات، وتبوآت مناصب دولية مرموقة، آخرها واهمها حصولها على منصب كبيرة العلماء فمنظمة الأغذية والزراعة للأمم المتحدة فمنطقة الشرق الأدنى وشمال إفريقيا، وهو منصب جديد يالاه تحدثت قدرات تظفر بيه العالمة المغربية.
ومنظمة "الفاو" أشادت بالباحثة المغربية خلال تنصيبها، وقالت أنها كتمتكل "معارف غنية وواسعة بمنطقة الشرق الأدنى وشمال إفريقيا وستشكل ثروة حقيقية للاستجابة للتحديات التي تواجه المنطقة".
وطتعتب الوافي من مناصري تنويع المحاصيل المهملة وغير المستغلة بالكامل، وإعادة النظر فالنظم الغذائية ككل، كيف تعرفات بعملها على استخدام المياه غير العذبة في الزراعة، وتمكين المرأة في مجال العلوم.
واسمهان الوافي كذلك هي المدير العام للمركز الدولي للزراعة الملحية (ICBA) اللي المقرد ديالها فدبي، وسبق ليها تصنفات بين 20 امرأة من بين أكثر النساء نفوذا في العلوم في العالم الإسلامي.
وعند الوافي تقريبا 20 عام من الخبرة فمجال البحوث والتنمية الزراعية فآسيا وأفريقيا والشرق الأوسط.
أمينة ماء العينين.. برلمانية "إخوانية" بمواقف حداثية
انتخابات 2011 مكناتها من الوصول للمنصب البرلماني اللي عمرها كانت كتخطط ليه، هي اللي كبرات وسط عائلة بسيطة معتدلة التدين، وخدمات كأستاذة دالفلسفة فمدينة تيزنيت جنوب المملكة، وتزوجات بزميل ليها وولدات معاه جوج وليدات.
أمينة ماء العينين، ذات الأصول الصحراوية، ماكانتش كتخيل انها غتحقق هذ النجاح السياسي، او غتوصل لقبة البرلمان، لكنها بمجرد انخراطها فحزب العدالة والتنمية، وتعلمات وسطو أبجديات العمل السياسي اتضحات ليها الرؤى، وسعات للتغيير ومحاربة الفساد والاستبداد، ونضالاتها مكناتها من الحصول على مقعد بالبرلمان فاللائحة الوطنية لجهتي سوس ماسة درعة، ثم بعدها صبحات عضوة بلجنة العدل والتشريع فالبرلمان.
مجموعة من المراقبين لاحظو، من خلال خرجات ماء العينين، أن قناعاتها بدات كتغير شيئا فشيئا، وانها مؤخرا عبرات على مواقف حداثية، لا تمت بصلة بالمبادئ "الراسخة" لحزب العدالة والتنمية، منها على سبيل المثال ما يتعلق بالحرية الفردية للأشخاص، اللي اعتبراتها ماء العينين فخرجات كثيرة أنها كتتعلق بالأفراد، انفسهم، ولا يحق للدولة أن تتدخل فيها بأي شكل من الأشكال.
وواخا كتنتمي ل"البيجيدي"، ماء العينين عندها من ديما فكر متحرر كيميل للعقلالية، وهذشي اللي خلاها تختار دراسة الفلسفة وتدريسها، وأن عندها اصدقاء كثار يساريين، واخا ماكتفاهمش معاهم فمجموعة من النقاط، كيف أنها كتقبل الرأي والرأي النقيض، ومستمعة جيدة، وعندها مرونة كبيرة فالتعامل السياسي.
وعلى المستوى السياسي، ماء العينين بينات على مواقف قوية كتخلق من خلالها الجدل، آخرها كانت دعوتها لرص الصفوف داخل الحزب الإسلامي، وطلبها للأعضاء بالاتحاد فيما بينهم، لأن الحزب كيعيش مؤخرا "مخاض عسير".
عائشة الدويهي.. صوت الصحراء المغربية فمجالس حقوق الإنسان
عائشة الدويهي ناشطة راكمات تجارب كثيرة فمجال حقوق الإنسان، ووهبات عقدين من الزمن فالدفاع عن القضايا الكونية العادلة، وخاصة اللي عندها ارتباط بالأقاليم الجنوبية للمملكة، وكذا مخيمات تندوف، بحيث كانت واحدة من الأصوات الصادحة اللي دافعات على حقوق الصحراويين فتندوف وحقهم فالعيش الكريم والكرامة فبلادهم المغرب سواء من منبر مجلس حقوق الانسان فجنيف السويسرية أو نيويورك أو فمدن مغربية وأوروبية.
عائشة الدويهي بنت خيمة كبيرة فالصحرا "أهل ادويهي" من قبيلة إزرگيين وهادشي خلا صوتها مسموع أكثر فاش كانت واحدة من المشاركين فالإجتماعات مع الإتحاد الأوروبي على ود تجديد الإتفاقيات التجارية بين الإتحاد الأوروبي والمملكة المغربية، ولي كانت محطة تأكد فيها الجانب الأوروبي من الأثر الإيجابي لهاد الإتفاقيات على ساكنة المنطقة لي هي واحد منهم.
بنت الدويهي وفبداية مسارها الحقوقي صنعات لنفسها إسم معروف على الساحة الحقوقية من خلال رئاستها لمرصد الصحراء للسلم والديمقراطية وحقوق الإنسان، وتمكنات فمستهل سنة 2020 أنها تكون أول مغربية من الصحرا تربح الجائزة النسائية للريادة الدولية بفضل خدمتها لي كان عِمادها الدفاع على القضايا العادلة للإنسان ومبادرات من أجل ترقية عمل المجتمع المدني وتعزيز المشهد الحقوقي فالصحرا.
أسماء المرابط.. الداعية للإسلام المعتدل والمساواة بين الجنسين
تعرفات كثر فواقعة استقالتها من منصبها فالرابطة المحمدية للعلماء، بسبب خرجاتها المتعلقة بالمساواة في الإرث بين الجنسين اللي ماراقتش بعض المسؤولين فيها، ولكنها، وواخا هكذاك، ماحبساتش من التعبير عن رأيها، وفكل خرجة كتحاول ما أمكن توصل فكرتها بحرية وشجاعة، واخا عارفة أن شي شيوخ ودعاة كارهين للآراء المخالفة، وغادي يهاجموها وينعتوها بأبشع الأوصاف، بحال عوايدهم.
أسماء المرابط، هي الباحثة المغربية الوحيدة فمجال الدراسات الإسلامية اللي كتعتبر نقطة ضوء بالمقارنة مع زميلاتها، بالنسبة ليها الإسلام دين تسامح وتعايش، كيحفظ الحريات الفردية للأشخاص، والرجل والمرا فيه متساويين.
وفخرجة أخيرة ليها، علنات المرابط أن الفصل 490 من القانون الجنائي اللي كيجرم العلاقات الجنسية خارج إطار الزواج مخالف لتعاليم واخلاق الإسلام، وماصالحش لمغرب اليوم، حيت تحريم هذ العلاقات الجنسية جا مقرون بمجموعة من الشروط، اللي جعلات إثباتها أمر مستحيل لإقرار العقوبة، واهم هذ الشروط وجود 4 شهود على "الزنا".
والمرابط، هي من مواليد 1961 بالرباط, وهي كذلك طبيبة متخصصة في تشخيص أمراض سرطان الدم، وعندها مؤلفات كثيرة عن المرأة والإسلام، وخدات جائزة العلوم الاجتماعية من منظمة المرأة العربية عن كتابها "النساء والرجال في القرآن: أي مساواة؟"
فوزية.. فنانة مغربية وصلات للعالمية
كلشي كيهضر هذ الأيام على الكليب ديالها الجديد مع جون ليجند، بعنوان Minefields، واللي حقق نجاح كبير، وفظرف شهر ماكاملش وصل ل10 مليون دالمشاهدات، فوزية أويحيى كتعتبر من الفنانات المغربيات اللي حاولو يسمعو صوتهم خارج الحدود، ويديرو أعمال مع نجوم عالميين.
هي مغنية كندية مغربية، تزادت فمدينة كازا عام 2000، قبل ما تستقر هي وعائلتها فمدينة كارمان فمقاطعة مانيتوبا فكندا.
فسن صغيرة، وتحديدا 15 لعام، حصلات فوزية على جوائز أغنية العام، وجائزة الجمهور، والجائزة الكبرى فLa Chicane Éléctrique، فاللول كانت كتحط غير كوفرات ديال أغاني فيوتوب، وهذشي زاد من محظوظيتها باش تعرف وتشهر، حتى استطعات توقع عقد مع وكالة لاكتشاف المواهب اسمها Paradigm.
وف2017، حصلات فوزية على الجائزة الكبرى في المسابقة الموسيقية Unsigned Only بناشفيل، وفازت بالمسابقة الدولية لكتابة الأغاني فنفس السنة، بعدما تعاونات مع مات إب فأغنية The Sound، وهنا كانت بداية الكاريير ديالها الفنية.
وكان سبق للديدجي الفرنسي، دافيد كَيتا، شكر فوزية، واعترف فمقابلة صحافية ليه بأنها موهوبة، وصوتها رائع وقوي، وعندها أسلوب منفرد.