السلطات وافقات على قانونية المؤتمر الاستثنائي دالسبع اللي غيجري على زيان

صادقات وزارة الداخلية على قانونية اللجنة التحضيرية للمؤتمر الإستثنائي للحزب المغربي الحر، وعطاتها وصل الإيداع.
وبناء على هذ القرار، فأشغال المؤتمر الاستثنائي دحزب السبع غدوز بطريقة قانونية، وخا المنسق الوطني للحزب، محمد زيان، ومجموعة من الحلفاء ديالو، مامعترفينش بيه.
وترشحو لمنصب المنسق الوطني للحزب كل من العضوين يوسف خودار وإسحاق شارية، هذ الأخير اللي كان قبل نائب زيان.
وكان سبق للمجلس السياسي دالحزب دار دورة غير عادية، علن فيها على عقد مؤتمر استثنائي، وتجميد صلاحيات المنسق حالي والمكتب السياسي، وإلغاء الاستقالات وقرارات الطرد وحق مجموعة من الأعضاء معارضين لزيان.
وهذشي كلو بدا بعدما خرج زيان ببلاغ باسم للحزب الحر، كيتهم فيه مؤسسة من مؤسسات الدولة بالتشهير بيه، كيف خرج ففيديو تكلم على هذشي، وهي الخرجات اللي تبراو منها مجموعة من الأعضاء سيما وأن زيان "صادر رأيهم فالتعبير على رفضهم ليها"، كيف قالو بزاف منهم.