فيضانات كازا. "ليديك" كتعتذر والكازاويين كاعيين: سيري فحالك راك مادايراش خدمتك وحطينا شكايات وماتوصلنا بحتى جواب – تدوينة

خرجات الشركة المكلفة بالتدبير المفوض للتطهير السائل فكازا، فمنشور ليها على "فيسبوك"، تعتذر للكازاويين على الإزعاج اللي تسببات فيه الأحوال ديال الطقس، والشتا اللي طاحت بزاف واللي حدثات فيضانات وقطعات الطرقان.
وقالت، فمنشورها نفسو، أنها كتحذر الناس ومستعملي للطريق، وكتطالبهم بتوخي الحذر واتخاذ الاحتياطات اللازمة، كيف علنات أنها غتواصل معاهم وتكفل بالشكايات ديالهم.
لكن منشور "ليديك" ماتقبلوهش الكازاويين، وخلاهم يحتجو فالتعليقات ويطالبو الشركة خصوصا بالرحيل، هذشي فالوقت اللي قال البعض أن ليديك كتكذب، والبعض الآخر طالبها باش تدير خدمتها على أكمل وجه.
وكاين مجموعة من المواطنين فالتعليقات قالو ل"ليديك" انهم تقدمو بشكايات كثيرة وماتوصلوش بجواب، بعدما تضررو بسباب احوال الطقس المضطربة.
وهذ الثلث أيام عرفات كازا تساقطات مطرية غزيرة، تسببات ففيضانات فمجموعة من المناطق، من بينها عين الشق وحي السدري والحي الحسني وليساسفة وتيط مليل، بالإضافة لأن مجموعة من الطلقان تقطعات.
https://m.facebook.com/story.php?story_fbid=4136843156328371&id=189333421079384