قصة مغربية وصافي. مسؤول ف"لامورگ" غلط فجثث جوج عائلات. دفنو وسالاو وها كيفاش عاقو وجبدو الجثث

سيدة خمسينية من منطقة ويركان الواقعة فطريق تارودانت القديمة بحوز مراكش، حساب بآلام اول امس الاثنين، نقلوها لصبيطار عمومي فمراكش. ودعات تماك. حتى هنا القصة عادية وكيوقعو بحالها عدد. الغريب٬ وفق مصدر "كود"٬ بدا باش بغات العائلة تسلم جثتها. مشاو لامورگ وتسلمو جثة سيدة اخرى.
الفيلم طول٬ وفق مصدر "كود"٬ المسؤولين على مستودع الاموات سلمو جثة السيدة لعائلة اخرى. هادوك داوها وصلاو عليها ودفنوها. مساكن صحبوها امهم.
ناض الصداع وتخبرو الجدارمية والسلطات المحلية ووكيل الملك. وفق مصدر "كود" فان المسؤول القضائي امر باعادة حفر القبر وتسليم الجثة ديال السيدة لأهلها.. هذا المساء وصلات الجثة لمورغ باش يديوها لويركان..
اللي وقع هو أن المسؤول ديال مستودع الأموات غلط فالنوامر ديال الجثت٬ وفق مصدر "كود". قصة مغربية وصافي..