اش وقع ف 2020. كورونا غيبات اللاعب 12 وقتلات المتعة عند الكوايرية بسباب التيرانات الخاوية والفراقي كلاو العصا فكلشي

كورونا بدلات بزااف ديال الحوايج عند جمهور كرة القدم بالمغرب خصوصا الناس اللي مولفة تمشي للتيران وتشجع الفرقة ديالها. هاذ الشغف اللي كيكون عند المشجع الحقيقي قتلاتو كورونا مع التدابير والاجراءات الوقائية لمواجهة الجائحة. وحتا اللي ما كيمشي للتيران مولف يتفرج في القهوة. هاذ الاجراءات خلات المشجعين في حالة صدمة بعد توقف جميع الدوريات ماشي غير البطولة المغربية بل لاليغا، كالشيو، شومبيونز ليغ ديال أوروبا، عصبة الأبطال الإفريقية..
وحتا مع عودة المباريات بعد انحسار نسبي لتفشي الوباء عبر دول العالم بقات التيرانات الخاوية. هاذ المنظر أثر على عطاء اللاعبين في جميع البطولات الكروية العالمية. تيران خاوي من الجماهير كيفاش بغيتي اللاعب يعطي مزيان في الماتش.. غياب الجماهير قتل المتعة عند اللاعبين وبين أهمية اللاعب 12 والقيمة ديالو في الماتشات..
كورونا دكَدكَات الفراقي بالمعقول وهاذ الشي خلا رئيس مجلس إدارة نادي بايرن ميونخ واللاعب الألماني المشهور عالميا رومينيغه يحذر من انهيار "البوندسليغا" البطولة الألمانية في ظل غياب الجماهير.
إقامة المباريات خلف الأبواب المغلقة بدون جماهير، خلف أثر شبه مدمر على ميزانية العديد من النوادي الكروية عبر العالم، بسبب اعتماد ماليتها على عوائد تذاكر المباريات في دفع تكاليف المباريات ورواتب اللاعبين والموظفين. ومع غياب الجماهير أصبحت العديد من الأندية مهددة بالإفلاس، وتم تسريح عدد كبير من العاملين الإداريين والمساعدين داخل النوادي وبزاف ديال الفراقي اجتهدو من عندهم واقترحو على اللاعبين النجوم ديالهم تخفيض الرواتب.