زلزال فالبي جي دي. افتاتي ل"كود": دعوتي فك الارتباط بالحكومة وتكليف نائب الامين العام بالحزب شخصية والمواجهة داخل الحزب خط احمر وما يمكنش نمشيو فلغة التخوين وننساو باللي التناقض الرئيسي مواجهة المشروع الصهيوني

توقيع سعد الدين العثماني بصفته رئيسا للحكومة واللي هو كذلك امين عام لحزب العدالة والتنمية على الاتفاق المشترك المغربي الاسرائيلي الامريكي زلزل الحزب الاسلامي. نايضة فيه مزيان. عضو الامانة العامة للحزب عبد العزيز افتاتي خرج اليوم بدعوة. فيها: خروج الحزب من الائتلاف اللي هو كيرأسو ثم تكليف سليمان العمراني بادارة الحزب. اي يجريو على سعد الدين العثماني وصافي.
بالنسبة لافتاتي فتصريح ليه ل"كود" فان ما " وقع كبير بزاف" وخاص "كل واحد يتحمل مسؤوليتو" و"يواجه الوضع الجديد".
فسؤال ل"كود" واش كان اخبار من العثماني لقادة الحزب قبل هاد التوقيع قال افتاتي " "لا اتصور ان مسؤولا فالحزب كان على علم. الدولة هي من دبرت العملية".
افتاتي كيقول وكيعاود باللي هاد الافكار هي اراء شخصية وحذر فتصريحو ل"كود" من تحويل التناقض الرئيسي المتعلق بمواجهة المشروع الصهيوني الى تناقض بيني فمواجهة داخلية فالحزب او بين الحزب واحزاب اخرى او بين الدولة والحزب. هاد الشي مرفوض وخاص كلشي يتصدى ليه"
وحول اش غادي يوقع مستقبلا٬ قال افتاتي ل "كود" "الحزب غادي يلقي المساهمة ديالو في مواجهة المشروع الصهيوني. واضاف ل"كود" "في اعتقادي ان الحزب سيوفر الاجابة المطلوبة" ودعا الى التروي "لا داعي للعجلة لا بد في الشروع في العمل. خاصنا اجابات ديال خمس سنين ولكن هاد الشي ما كيدارش خاصو التفكير وخاصو الوقت".
دابا واش غادي يدار مجلس وطني او شي حاجة اخرى. افتاتي خلى كلشي لما سينتجه قادة الحزب من افكار