السلطات زيرات الصويرة بسباب كورونا

السلطات المحلية فالصويرة علنات، الجمعة، اعتماد مجموعة من الإجراءات الوقائية والاحترازية للحد من انتشار فيروس كورونا المستجد.
هذ القرار تخاد بعد اجتماع دارتو السلطات الإقليمية، فنفس اليوم، باخذا بعين الاعتبار الوضعية الوبائية اللي كتعرفها المنطقة.
وهكذا غيوليو المتاجر والحوانت فالمدينة يسدو مع 8 دالليل، فكاع الأحياء اللي كتشهد ارتفاع فالإصابات، والسوق الاسبوعي السقالة غيولي يسد مع 4 دالعشية، والقهاوي والريسطورات حتى هوما مع 8 خاصهم يسدو، وغيتمنعو الماتشات دكورا فيهم باش مايكونوش التجمعات.
هذ الإجراءات غتبقى مستمرة لمدة 15 ليوم ابتداذ من اليوم السبت، ويمكن القرار يعاود يتمدد حسب الوضعية الوبائية فالصويرة واش تحسنات ولالا.