بغاوها واقيلا تدخل بالنقاب بحالا عمرهم شافو سروال دجين.. صحافية دخلات لجامع تدير خدمتها صوروها وماخلاوش ليها بسبان والمعيور

هذ الناس مازال مابغاو يفهمو أن بنادم حر فلباسو وفتصرفاتو، وماحدو ما آدى حد ما منحق حتى واحد يتدخل فيه.
واحد الصحافية مصورة دخلات لجامع فمراكش، قبل ما تبدا صلاة الجمعة، البارح، باش تصور هذ الحدث بعد اشهر طويلة تمنعات فيها صلاة الجمعة بسبب "كورونا"، مشاو صوروها وشوهوها وحطو تصاورها ففيسبوك فقط حيت لابسة سروال ديال الدجين.
وتم تداول تصاور الصحافية على نطاق واسع على مواقع التواصل الاجتماعي، كلشي كيسبها ويعايرها ويلعنها حيت قالو "ماحتارماتش حرمة المسجد"، في حين أن هذ اللباس مافيهش كَرام ديال الإثارة وكلشي كيلبس بحالو، وصلاة الجمعة كانت مازال ما بدات والناس عاد داخلين، وهي واقفة غير فالدخلة ديال الباب وماشي لداخل، ومابرزطاتهمش وهوما كيأديو الشعيرة ديالهم.
عاد شي وحدين اتهموها بكونها دخلات بالسباط، فالوقت اللي باين من خلال التصاور انها لابسة تقاشر كوحل وماشي حاجة خرى.
لكن فالمقابل، كاينين بزاف ديال نشطاء ماشافو حتى عيب من هذ الفعل اللي دارت المصورة، وقالو أنه كيدخل فصميم خدمتها.