الراضي رد على نقابة الصحافة على شبهة الاغتصاب: النقابة منحازة لمنطق "التعليمات الفوقية".. واستمعات للمشتكية فالملف بوحدها وآزراتها من لفوق.. وهذي إدانة مسبقة ليا

قال ادريس الراضي، بات الصحفي المعتقل عمر الراضي، أن ولدو ساق لخبار للبلاغ الأخير دالنقابة الوطنية للصحافة، على قضايا كيتم التحقيق معاه بخصوصها، وتأسف لكون أن النقابة "مازال مستمرة فالانحياز والخضوع للحسابات والمصالح الخاصة بالمتحكمين فإدارتها، ومنطق التعليمات الفوقية"، حسب تعبيرو.
وكشف ادريس، بلسان ولدو، أن هذ الأخير استجب لدعوة النقابة للاستماع ليه فقضية منظمة أمنستي وتداعياتها، واستمع لوجهة نظر النقابة، وماعطى حتى شي وعد لإجراء خبرة على التيليفون تشارك فيه النقابة، والتقدير ديالو كان هو أن النقابة مامتمتعاش بشروط الاستقلالية والحياد.
عمر الراضي كذلك شاف أن النقابة تحيزات فموضوع الاعتداء الجنسي، وسمعات لطرف وحيد وآزراتو من لفوق، وماخداتش بعين الاعتبار البيان اللي دار الراضي وماهضراتش مع محاميه وعائلتو، والناس اللي كانو حاضرين نهار الواقعة.
وقال الراضي أنه، وبمبادرة منو، كان بغا ينظم الندوة ديالو الصحافية فمقر النقابة، "على الرغم من الاختلاف مع توجهات اللي كيقودوها، باش يكون هذا أمل لتصالح الصحافيين مع نقابتهم"، على حساب كلامو.
وقال ان النقابة مزال ماقادراش تتخذ موقف واضح من الاتهامات اللي وجهات ليه بشأن التخابر مع دول أجنبية والمس بسلامة الدولة.