سكوب. كيفاش كازا حطمات اليوم الروكور فكورونا فيروس. مصدر من وزارة الصحة ل"كود": اكثر من 900 حالة وها فين تسجلو وها عدد الحالات وطنيا

رقم قياسي جديد فعدد الاصابات فكورونا فيروس تسجل اليوم فالدار البيضا. فحسب مصدر من وزارة الصحة ل"كود" فان عدد الاصابات فات 900 حالة ف24 ساعة. هادا روكور جديد. "كود" اتصلت بمندوبية وزارة الصحة فجهة الدار البيضاء باش نعرفو معطيات اكثر فهاد الموضوع ولكن حتى حد ما رد علينا. بحال ايلى هاد الموضوع طابو.
هاد الشي علاش سولنا مصدر فوزارة الصحة بالرباط واللي شدد باش ما نكشفوش على اسمو. هاد المصدر اكد ل"كود" باللي الحالات بالضبط 913 حالة.
المصدر قال ل"كود" باللي غالبية هاد الحالات كانينين فسيد البرنوصي وفانفا. المصدر نفسو قال ل"كود" باللي كلشي مسؤول على هاد الرقم من المواطن حتى السلطات وكنهدر على كلشي ماشي وزارة بعينها وباللي وزارة الصحة عندها مسؤولية ودابا خاصها تعامل مع هاد الارتفاع واخا ما كاين امكانيات.
المصدر كرر فتصريحو ل"كود" باللي هاد الرقم اكثر من نصف الارقام المسجلة اللي قدرها فاكثر 1500 حالة. المصدر قال ل"كود" باللي باش نتجاوزو هاد الشي خاص كلشي يساهم. كلشي كلشي.