سكوب. تسوماني جاي لولاية الامن فكازا. كاع اللي متورط ولا متهاون فليالي عين الدياب الحمراء المخالفة للقانون غادي يودي ومسؤول ل"كود" غادي يطبق القانون حماية لصحة لمغاربة ولو تطلب الامر اغلاق كاع مطاعم الكورنيش ومحاكمة مالين المخالفات

تسوماني منتظر فولاية امن الدار البيضاء الكبرى على علاقة بتداعيات حملة الايادي النظيفة اللي طلقاتها المديرية العامة للامن الوطني. هاد الشي اللي اكدو مصدر مأذون ل"كود".
المصدر اوضح باللي هاد الشي باشراف مباشر من المدير العام للامن الوطني عبد اللطيف الحموشي وان هاد حملة الايادي النظيفة اللي الهدف منها حماية صحة المغاربة وتطبيق القانون
مصدر "كود" شدد على ان جميع الخارجين عن القانون وكل المتورطين معهم او المتهاونين من ولاية امن كازا فعلاقة بمطاعم عين الدياب غاديين يخلصو
المصدر المأذون اكد ل"كود" ان حملة الايادي النظيفة اللي اعطى الحموشي اوامره بانطلاقها غادية تستمر "ما شاء من الوقت" حتى كاع المتورطين فخروج مطاعم كورنيش على الدباب على القانون، يوليو خاضعين للقانون
وفق ما علمته "كود" فهاد الحملة غادية تبقى "حتى لو تطلب الامر اقفال جميع المطاعم حماية لتطبيق القانون وحماية لصحة المغاربة"
الدولة كيطلع عليها مرضى كورونا بالغلا. دابا تطبيب مصاب بيها كيطلع علينا ب5 المليون ورعاية مصاب عادي ب25 الف درهم يعني جوجت المليون ونص. يعني صحة لمغاربة اهم من ترفيحة لملايرية
المصدر شدد ل"كود" انو غادي يتقدم للمحاكمة اي واحد تبث تورطو فالمسؤولين او فصحاب المطاعم