اش وقع فالكابيستون البارح؟ شهادة صحافي ل"كود": اللي تقال كذوب واللي زممو ليهم المخالفة دارو علاش وما سولني حد ولا قرب مني حد

البارح مواطن اسمو م. ب كان مع مراتو كيتعشى فكابيستون٬ ريسطو شيك فالعنق فكازا٬ دار تدوينة كيقول باللي تعامل معاه البوليس فشي شكل وباللي زممو ليه مخالفة ب300 درهم هو ومراتو نفس المخالفة بسباب لكمامة. قال باللي ما فهمتش علاش دارو ليه هاد الشي وباللي 35 واحد زممو ليهم مخالفة. لكن هاد الشخص اللي كتب هاد الشي فصفحتو ما قالش كلشي.
حسب رواية صحافي كان تماك البارح معشي مع مراتو٬ هاد الشي ماشي دقيق. "انا حتى حد ما هدر معايا. البوليس ما سولونيش. كنت داير الكمامة فيدي ومراتي حاطاها فالطابلة" الصحافي قال ل"كود" "هادوك اللي زممو ليهم المخالفة ما عندهمش لكمامة. باش سولهم البوليس هما للي تعاملو خايب فاللول ثم قالو ليهم راها فالطونوبيل واش بغيتونا ندخلو بيها.
يعني ان هاد الزبائن ما كانوش دايرين لكمامة من طونوبيلتهم للمطعم. واخا غير عشرين مترو راها مخالفة. يعني يستحقو يخلصو. اذن اللي دار تدوينات البارح دار التضليل ووقف عند ويل للمصلين. المطعم طبعا هو المسؤول