لجنة الفيفا سالات مهمتها ولجنة ترشيح المغرب فمونديال 2026 ناشطة وفرحانة: كلشي دار مزيان بزاف. ها فين تعشاو ها وقتاش مشاو

البارح الخميس كان اخر عشاء نظمته لجنة ترشيح المغرب لاستضافة كأس العالم لكرة القدم سنة 2026، على شرف فريق عمل الاتحاد الدولي لكرة القدم (فيفا) المكون من خمسة أعضاء، مرفوقين بأعضاء من إدارة الاتحاد. هاد الفريق من الاثنين اللي فات وهما فالمغرب. زارو غالبية المدن اللي قدمناها باش نحتاضنو المونديال.
العشا كان ف”كابيستون” احد مطاعم كازا المعروفة اللي كاينة فالعنق. لجنة ترشيح ملف المغرب وفق مصدر منها ل”كود” ناشطة بزاف من هاد الزيارة. كلشي داز مزيان مزيان يشرح مصدر “كود”.
اللجنة كانت متخوفة من الاول ولكن فالاخير هاداك الشي عجبهم. عجب اللجنة اللي غادية تنقطنا وعلى اساس هاد التنقيط غادي نشوفو المغرب واش يدوز للمرحلة النهائية اللي فيها التصويت ولا اللا. حسب المصدر نفسه فالامور غادية فالاتجاه الصحيح.
البارح باش تعشات اللجنة فكابيستون مشات لمطار محمد الخامس مع لحداش. كانت عندها الطيارة مع الوحدة الليل. اليوم مع الثالثة غادية تكون ماشي ندوة صحافية ولكن تصريح صحافي لرئيس اللجنة مولاي حفيظ العلمي بحضور فوزي لقجع عضو اللجنة رئيس الجامعة الملكية لكرة القدم. هادو بجوج بقاو مع اللجنة حتى ودعوها فالمطار. ما تفارقوش معاهم من نهار حطو رجلهم فالمغرب