تطبيقا لقرار الداخلية.. المحطات الطرقية فكازا ومراكش وطنجة سدو

المحطات الطرقية فالمدن الثمانية اللي منعات الداخلية التنقل منها وليها بدات كتسد وحدة مورا لخرى، لبارح الاثنين تقرر إغلاق محطة ولاد زيان فكازا، حتى لإشعار آخر، نفس الأمر بالنسبة للمحطة الطرقية باب دكالة فمراكش، حتى هي تسدات.
المحطات بجوج، وخصوصا ولاد زيان، عرفات اكتظاظ كبير من طرف المواطنين فليلة "الهروب الكبير"، من بعد ما جراو ليها باش يسافرو عند عائلاتهم باش يعيدو معاهم بمجرد صدور القرار ديال الداخلية نهار الأحد، واللي كان غيدخل حيز التنفيذ مع 12 دالليل.
وحتى المحطة الطرقية فطنجة ومحطة القطار سادين هذي سيمانة، بحيث فرضات السلطات الحجر الصحي على المدينة، بعدما عرفات تزايد فعدد الإصابات بفيروس كورونا المستجد.
وفالغالب حتى باقي المحطات الطرقية فالمدن الأخرى اللي شملها القرار غادي تسد، وكيتعلق الامر بمكناس وفاس وبرشيد وسطات وتطوان.