عملية مرحبا 2020. ها التواريخ اللي تقدر تدخل فيها الجالية.. والتدابير غتكون مزيرة بزاف بسباب كورونا.. وماغاديش دوز من سبتة ومليلية

من بعدما يومية "اسبانيول" الاسبانية قالت ان عملية مرحبا هاد العام كاينة وتقدر تبدا ف15 يوليوز، عكس الاعوام الماضية اللي كانت كتبدا فيوليو، وزارة التجهيز والنقل واللوجستيك والماء، خرجات بروتوكول متعلق بها، فيه فوقاش وكيفاش وفين..
وحسب الدليل اللي صدرات الوزارة فان العملية، وبسباب فيروس كورونا المستجد، تقدر تبدا اما نهار السبت 4 يوليوز 2020، او الثلاثاء 7 يوليوز، ولا ف30 فنفس الشهر. ولا حتى لغشت وبالضبط يوم الاحد 16، وفاللول ديال شتنبر.
ويقدر يتم تخصيص 23 باطو لعملية مرحبا 2020، وماغاديش دوز من سبتة ومليلية. غادي تكون رحلات غير من/والى طنجة والناظور والحسيمة.
اما بالنسبة للتدابير الوقائية فظل جايحة كورونا، فغادي تكون متشددة بزاف. مثلا، قبل من منح تذكرة السفر، اللي غادي تكون غير عبر انترنيت، خاص الركاب يكون عندهم تيست ديال كورونا نيگاتيف، وغادي يعبرولهم حرارتهم قبل الركوب، ويكونو لابسين الماسك. وطبعا فاش يوصلو يقدرو يتطبقو عليهم تدابير اخرى.
وخاص الركاب والبيرسونيل يلبسو الكمامات، ويحتارمو التباعد الاجتماعي، ويوقفو فالبلايص المخصصة ليهم.
وداخل الباطو اللي غيكون تعقم من قبل، غادي يكونو معقمات، والكراسة مباعدين، ومناطق خاصة لعزل اشخاص مشكوك فكونهم مصابين بالفيروس، ومعلومات خاصة بكورونا ملصقة فين ما مشيتي.