الحصيلة الوبائية لكورونا فهذ 24 ساعة: المغرب حقق رقم قياسي جديد فمعدل حالات الشفاء اليومية بكورونا والوضعية الوبائية كتحسن.. سجلنا 434 حالة شفاء وغير 26 إصابة وحتى واحد ما مات

اليوم الإثنين، حطم المغرب الروكور فعدد حالات الشفاء اليومية بفيروس كورونا المستجد مللي بدا الوباء لحد الآن، حيت غير فهذ 24 ساعة الأخيرة سجلنا 434 حالة شفاء، ووصلنا فالمجموع ل5893 حالة، أي بما يقارب 75 فالمية من عدد الإصابات الإجمالي.
وحسب معاذ المرابط، مسؤول وزارة الصحة، فاليوم وزارة الصحة استبعدات 12 ألف و389 حالة إصابة بالفيروس، خرجات تحاليلها سلبية، وبالتالي سجلات رقم قياسي جديد فعدد التحاليل اليومية، اللي تجاوز هذ المرة 12 ألف تحليلة، وهذشي "بفضل الخطة الوطنية للرفع من عدد التحليلات اليومي"، على حد قولو.
بالنسبة للإصابات، كيقول المرابط، فندوة الترصد الوبائي لفيروس كورونا المستجد، أن اليوم تسجلات 26 إصابة جديدة، وهو حسبو عدد قليل، وهكذا وصل عدد المصابين فالطوطال ل7833.
وقال أن 23 من هذ الإصابات تم اكتشافو فإطار منظومة تتبع المخالطين، اللي شملات فالمجموع 47195، ولحد الساعة مازال 7706 دالمخالطين رهن المراقبة الصحية.
واليوم، حسب المرابط، ماتسجلات حتى شي حالة دالوفاة، وبقى عدد المتوفين مستقر ف205، واستقرات نسبة الوفيات ف2,6.
وكشف بللي معدل السن ديال المصابين تحدد ف35 سنة، 61 فالمية منهم ذكور و39 إناث، وفقط 13 اللي كاينين فأقسام الإنعاش.
وفالمجمل، شاف المرابط بللي الأمور غادة وكتحسن تدريجيا، وخاص المواطنين يلتزمو بالحجر الصحي والتدابير الوقائية.
وهذا التوزيع الجغرافي للإصابات بالنسبة المئوية: