عاشت وضعية صعبة من شهر مارس.. وفاة مغربية حاصلة فلندن

توفات هذ الصباح مواطنة مغربية، من المغاربة اللي حصلو فالعاصمة البريطانية لندن، بسبب الظروف الصعيبة اللي كانت كتعيشها.
المتوفاة، اللي عندها 49 عام، عاشت ظروف مكرفصة بزاف منذ منتصف مارس، وكان جاها مرض فقدان الشهية، قبل ما تجيها سكتة قلبية أودت بحياتها.
وكان رئيس الحكومة، سعد الدين العثماني، أكد بللي عدد المغاربة اللي حاصلين برا المغرب، بسبب فيروس كورونا المستجد، بلغ أزيد من 31 ألف، وكشف بللي "الفرج قريب"، وبللي الوزارة الوصية كتجمع المعطيات على المغاربة الحاصلين، وكاتاخذ معلومات على وضعيتهم، باش تستعد لإعادتهم للمغرب.
ومللي بانت هذ الأزمة ديال كورونا، مجموعة من المغاربة عبر العالم، وخصوصا فاسبانيا وفرنسا، احتجو أمام السفارات المغربية، كيطالبو باش يرجعو لبلادهم، وكيتشكاو من الوضعية المكرفصة اللي كايعانيو منها وهم بعاد على عائلاتهم، فالوقت اللي تعلقات جميع الرحلات الجوية والبحرية للمغرب.