لإعداد الدفاع.. تأجيل جلسة محاكمة مول الباج اللي حط فيديو تشهير صوفيا طالوني بنحيلة.. والتهمة الموجهة ليه: نشر صور وأقوال بدون موافقة صاحبها

فثاني جلسة فالقضية، أجلات المحكمة الابتدائية بسيدي قاسم محاكمة (ك.ي)، مول الباج اللي حط مقتطف ديال لايف الممثل عبد اللطيف نحيلة مع المتحولة صوفيا طالوني، اللي سباتو فيه هذ الأخيرة وشهرات بيه.
وحسب ملف الجلسة، اللي اطلعات "كود" على نسخة منه، فالنيابة العامة حددات التهمة الرئيسية الموجهة للمعني بالأمر ف"توزيع صورة شخص وأقوال صدرت بشكل سري دون موافقته"، على عكس ما جاء فشكاية نحيلة اللي تكلم فيها على إرفاق الفيديو بعبارات كتحرض على العنف.
وتحدد تاريخ الجلسة المقبلة ف20 ماي الحالي، واللي ممكن تحمل تطورات ومفاجآت جديدة.
والمتهم كتتم متابعتو فحالة اعتقال، وتم إيداعو حبس أوطيطة فسيدي قاسم.
وللإشارة فهذ خونا حط فالباج ديالو مقتطف من لايف كانت دارتو صوفيا طالوني مع "نحيلة"، وكانت عايراتو فيه وشهرات بيه واتهماتو بأمور ماكايناش، وهذشي جبد عليه بزاف دالمشاكل مع المحيط ديالو.
ومنين مشا نحيلة يديكلاري بمول هذ الباج، لقى راسو حتى هو متابع حتى هو بتهمة خرق حالة الطوارئ الصحية، بحكم أنه جا للكوميسارية بورقة خاوية ديال الخروج الاستثنائي، وتمت متابعتو بتهمة إهانة موظف، وهي التهمة اللي كان نكرها بشدة، فتصريح سابق ليه مع "كود".