الفينال ديال أبطال إفريقيا ما بقاش ف دوالا والكاف كتقلب على ملعب جديد

الفينال ديال عصبة الأبطال الإفريقية ما بقاش غادي يتلعب في دوالا الكامرونية، بعدما الغى الاتحاد الكاميروني لكرة القدم گاع المنافسات الكروية ف البلاد، بسبب تداعيات أزمة كورونا المستجد.
وسبق للكونفدرالية الإفريقية لكرة القدم أن منحت شرف احتضان نهائي الأبطال لملعب دوالا الدولي، بعدما فضلاتو على مركب محمد الخامس "دونور" وملعب رادس في تونس.
دابا "الكاف" أصبحت مضطرة، باش تقلب على ملعب جديد يتلعب فيه الفينال، الا تقرر استئناف الموسم الكروي في مصر والمغرب، لحقاش تأهلو منهما أربعة ديال الفرق، وهي الوداد والرجاء والأهلي والزمالك.
وما شي بعيد تختار "الكاف" شي بلاد من جنوب الصحراء، باش تدير فيه فينال ديال الشومبيون سليگ، في الوقت، اللي غادي يحتضن ملعب المجمع الرياضي الأمير مولاي عبد الله نهائي ديال كاس "كاف"، كيف ما هو مقرر.