بعد الاشتباه فإصابتو بكورونا.. رئيس التحرير فقناة "مدي 1 تيفي" خرجو نتائجو سلبية والصحافيين فرحو بزاف

عرفات "كود" من مصادر موثوقة بللي رئيس التحرير فالقسم الفرنسي للأخبار فقناة "ميدي 1 تيفي" خرجو نتائج التحاليل اللي دار على فيروس كورونا المستجد سلبية.
وبعد يوماين ديال انتظار الصحافيين لنتائج الرئيس ديالهم، وخوفهم لا يكون نقل العدوى ليهم، دابا كاينة فرحة كبيرة فالقناة اللي غادي تكمل العمل ديالها بإرياحية بدون خوف من الفيروس.
وكان رئيس التحرير، اللي كينحدر من دولة إفريقية جنوب الصحراء، دار التيست على كورونا نهار الخميس اللي فات، بعد ما حس بأعراض مشابهة للأعراض اللي كتجي للمصابين بالفيروس، خصوصا وأنه خالط صديق ليه فالسيمانة اللي فاتت تاكدات الآصابة ديالو.
ومباشرة بعد هذ الخبر، التزمو الصحافيين فالقناة الإخبارية بالحيطة والحضر، واحتارمو التدابير الوقائية بشكل كبير، من مسافة أمان وتعقيم، تماما كيف وصاهم الطبيب الخاص ب"ميدي 1 تيفي".