مع الحجر الصحي وكورنا كلشي ولا عاطيها للمسابقات فانستكَرام.. وكاين لي استغل شهرة دنيا باطمة باش ينصب على الناس

مع انتشار فيروس كورونا، والحالة الطوارئ والحجر الصحي لي فارضهوم المغرب، تجار الأنستگرام تقطعو هاد العام من العراضات وقلبوها مسابقات.. وماكاين غير الملايين كتشير باش يحركو القضية.
بزاف ديال المؤثرات ديال انستكَرام بعدما لقاو راسهم ما عندهم دخل، قلبوها مسابقات ومنهم دنيا باطمة لي رجعات انستگرام ديالها بحال القيسارية وقلبتها بيع وشرا.
ومؤخرا، باطمة طلع ليها الدم من بعد ما دارو شي وحدين صفحة باسمها على انستكرام وبداو كيبيعو ويشريو بيها وحاولو يستغلو اسمها.
وباش دور الصرف مزيان في هاد الفترة، وتستغل اسمها لراسها، دنيا باطمة دارت حساب رسمي غير للمسابقات، سماتو give away by dunia batma، وقالت للمتتبعين ديالها الشرط باش يشاركو هو يتآبوناو لكاع الحسابات لي هي ابوني ليهم.