تسجيل إصابة جديدة بكورونا فحبس طنجة.. وصلو الإصابات فالمجموع ل6

تسجلات فالحبس المحلي دطنجة "سات فيلاج"، إصابة جديدة بفيروس كورونا المستجد، وهكذا وصل عدد المصابين فالطوطال ل6، منهم جوج موظفين.
وحسب المعطيات المتوفرة، فهذ المصاب ظهرات عليه علامات الإصابة، وهذشي اللي خلاه يدير التحاليل، ويطلع بوزيتيف.
وفآخر رد رسمي ليها، كانت المندوبية العامة لإدارة السجون وإعادة الإدماج كشفات، فالثلاثاء اللي فات، بللي تم إجراء التحاليل للموظفين فسجن طنجة، وطلعو جميع النتائج سلبية.
وأكدات المندوبية، فالصفحة الرسمية ديالها فموقع التواصل الاجتماعي "فيسبوك"، بللي مجموع الإصابات فالمؤسسات السجنية فجهة طنجة تطوان الحسيمة بلغ 7 إصابات، كاملة كاينة فالسجن المحلي فالقصر الكبير، وجوج منهم تشافاو.
وفالغالب غتخرج المندوبية ببلاغ رسمي تتكلم فيه على حالات طنجة فالقريب.