برلمانية من حزب بوكس لحكومة الاشتراكيين: كيفاش داير هاد التعاون الرائع مع المغرب لي مغرقنا بالحراگة وخذا لينا بحرنا

البرلمانية عن حزب بوكس فسبتة تيريزا لوبيز، هاجمات حكومة سانشيز بسباب المغرب، وذلك بعدما وجهات اسئلة للحكومة كتسول كيفاش المسؤولين كيتلاهاو بتقوية قدرات المغرب على الحدود فمليلية وسبتة وكيعطيوه العتاد والعدة، فالوقت لي خاص يديرو هادشي لبلادهم.
رد الحكومة كان بالقول أن البلدين كيجمعهم تعاون ممتاز، وهادشي لي خلا البرلماني المنتمية لليمين المتطرف، تكعى على رد الحكومة معتبرة أن هاد التعاون كيتجلى فاغراق المغرب لمدينة سبتة بالحراكة القاصرين، لدرجة ان مركز لا اسبيرانثا لايواءهم عمر ودارت السلطات مركز مؤقت، هادشي كولو حسب البرلمانية لأن المغرب مادايرش خدمتو.
وتساءلت البرلمانية واش هاد التعاون هو تغرق سبتة ومليلية بالحراكة، أو أنك تاخذ لبحورة ديالنا.
وطالبات البرلمانية من الحكومة أن تجاوب بصراحة علاش كتنمي قدرات المغرب فالوقت اللي خاصها تنمي قدرات أمنها على الحدود.