باش يقضيو ففترة تعليق الرحلات بسباب كورونا.. مكتب الصرف غيمكن كل مغربي حاصل برا من سحب 2 مليون زايدة على الفلوس اللي جاب معاه

اعلن مكتب الصرف، فرسالة موجهة لرئيس التجمع المهني لأبناك المغرب، على تمكينو للمغاربة اللي حصلو برا المغرب من دوطاسيون سياحية استثنائية، بالإضافة للفلوس اللي حولوها وجابوها معاهم، وهذ العملية غتدار بشراكة مع وزارة الشؤون الخارجية والتعاون الإفريقي والمغاربة المقيمين بالخارج.
وأكد مكتب الصرف، فالرسالة اللي طلعات عليها "كود"، بللي المغاربة اللي حصلو برا، بعدما تعلقات الرحلات الجوية والبحرية بسباب فيروس كورونا المستجد، غادي يستفدو من دوطاسيون ديال 20 ألف درهم (جوج مليون)، إلى توفرات فيهم مجموعة من الشروط، واللي هي يكونو راشدين، وكيسكنو فالمغرب، وحصلو برا فعلا، وخسرو كَاع الفلوس اللي جابوها معاهم.
ومن خلال هذ الرسالة، دعا مكتب الصرف جميع الأبناك باش تعلم الزبناء ديالها اللي حصلو برا، باش يرسلو طلباتهم من أجل الاستفادة من هذ الإجراء، مرفوقة بفوطوكوبي ديال الباسبور، وفوطوكوبي ديال لاكارط ناسيونال.
وكيمكن للمنحة تترسل لهذ الناس فليكارط ديالهم أنترناسيونال، كيف كيمكن تتسافط على شكل مانضة.