هذو بغاو ينشرو “كورونا” ويقتلونا.. مغاربة دارو كَنازة كبيرة فقنيطرة وذبحو فيها عجل ونشطاء كيطالبو السلطات بالتدخل

اليوم الناس فمنطقة ولاد وجيه بجماعة القنيطرة ماعجبهوم الحال وناضو يغوتو، من بعد ما نظمو جيرانهم، فالحي القريب من حمام بشرى، كَنازة حضرو ليها اكثر من خمسين شخص، وذبحو فيها عجل ودارو وليمة قدها قداش.
مجموعة من النشطاء على مواقع التواصل الاجتماعي، اللي كينتميو لهذ المنطقة، لامو هذ الناس حيت ماداوهاش فتعليمات وزارة الداخلية اللي منعات التجمعات البشرية اللي كتفوق 50 شخص، بالإضافة إلى أن الناس كانو كيتسالمو بالوجه ويتعانقو فالكَنازة، وماخايفينش من عدوى فيروس “كورونا” اللي حصد أرواح الآلاف عبر العالم، وتصابو بيه مئات الآلاف.
وحيت صحاب لكَنازة ماتسوقوش للظرفية الحرجة اللي كيدوز منها المغرب، النشطاء طالبو السلطات باش تتدخل فالقريب باش توقف المناسبات التقليدية اللي كاتجمع البشار فالمنطقة، حيت تقدر تهدد الصحة العامة ديال الناس وتساهم فالانتشار السريع ديال الفيروس.