نائلة التازي كتوضح ل”كود” حقيقة إلغاء مهرجان كَناوة بسبب “كورونا”

قالت نائلة التازي، منتجة مهرجان كَناوة بالصويرة، بللي “كاينة شوية ديال الزيادة فالإشاعات بخصوص إلغاء المهرجانات”، وأكدات أنه لحد الساعة حتى حاجة ما رسمية بخصوص إلغاء مهرجان كَناوة أو موازين أو غيرها كيف كيروج.
التازي أكدات، فتصريحها ل”كود”، بللي إلى كانت شي حاجة عندها علاقة بالتعليق أو التأجيل او الإلغاء غتسارع إدارة المهرجان بتأكيدها فبلاغ صحفي ويتم تعميمها على الجميع.
وزادت: “باقي على المهرجان 4 أشهر، فهذ الأشهر ماعرفناش آشنو غادي يوقع، واش غاينتشر الفيروس أو لا، فعلا كيتآنيلاو التظاهرات لكن اللي جاية فشهر مارس وأبريل، ماشي ماي ويونيو”.
وكشفات بللي اللجنة المنظمة للمهرجان كتوجد ليه من دابا، وبللي غاتكون الدورة ديالو الجاية ما بين 25 و28 يونيو 2020.