بسبب “كورونا”.. المغرب يقرر تأجيل بطولة الجامعات العالمية للعدو الريفي “كروس كانتري”

عرفات “كود” من مصادرها الخاصة بللي المغرب قرر يعلق الدورة 22 لبطولة الجامعات العالمية (كروس كانتري) اللي كانت غادي تستضفها مراكش ف7 مارس 2020، وتشرف عليها الجامعة الملكية المغربية للرياضات الجامعية.
وكيجي هذ التأجيل بعدما علنات اللجنة الوطنية للقيادة، لبارح الأحد، على إمكانية تعليق الأنشطة الثقافية والتظاهرات الرياضية بسبب فيروس “كورونا” المستجد (كوفيد)، اللي انتشر فالعديد من الدول وقتل المئات عبر العالم.
جهات عليا عطات أوامرها للجامعة الملكية المغربية للرياضات الجامعية باش تعلق التظاهرة اللي كان الإعلام الرسمي كيستعد منذ مدة لتغطيتها، بحيت كانو عوالين لي تيكنيسيان ديال الشركة الوطنية للإذاعة والتلفزة باش ينقلوها مباشرة، وحتى قناة الرياضية علنات عليها ووضعات إعلانها فموقعها الرسمي.
وفتصريحو ل”كود”، أكد عبد العزيز تخبارت، الكاتب العام للجامعة الملكية المغربية للرياضة الجامعية، صحة هذ الخبر، وقال بللي النشاط ماغاديش يتلغى، لكن غايتم التأجيل ديالو من بعد شهر أو شهرين.
وكشف تخبارت بللي الاتحاد الدولي غايعقد اليوم اجتماع عاجل باش يتم الاتفاق على التاريخ المناسب للتظاهرة، وزاد كيقول “للأسف هذي كثر من عامين وحنا كانوجدو لهذ التظاهرة، ودابا جا قرار تأجيلها وماعندنا ما نديرو”.
وللإشارة فهذ التظاهرة الرياضية الخاصة بالعدو الريفي كينظمها الاتحاد الدولي كل سنة فدول مختلفة عبر العالم، وكيشاركو فيها عدائين من مختلف الجامعات العالمية، وف2020 وقع الاختيار على مدينة مراكش باش تستضفها لأول مرة.