وزيرة خارجية اسبانيا فالمغرب. البيزنس اولا والاطمئنان على عدم تأثير دور اليسار الراديكالي المساند للصحراء على السياسة الخارجية ثانيا

وزيرة خارجية اسبانيا ارانتشا غونزاليث لايا غادية تبدا زياراتها الخارجية منذ تعيينها وزيرة للخارجية بالمغرب. الوزيرة جاية للرباط الجمعة الجاية 24 يناير. زيارة للتعارف اكثر. غادية تلاقى بوزير خارجية المغرب. كل واحد غادي يعرف الثاني ثم يناقشو المواضيع للي كتهم البلدين
الحكومة الاسبانية اللي كيقودها بيدرو شانشيز بتحالف مع اليسار الراديكالي بوديموس٬ قالت ان هاد الحكومة غادية تولي اهتمام كبير للاقتصاد. هاد الشي علاش جاب خبيرة فالتجارة الدولية وخدمات مديرة فمنظمة التجارة العالمية لمنصب وزيرة الخارجية. هادا كيعني ان زيارة رانتشا غونزاليث غادية تكون مركزة بشكل كبير على التعاون الاقتصادي. اسبانيا هي اول مستثمر اجنبي فالمغرب. فاتت حتى فرانسا.
لكن من النقاط المهمة اللي غادية تحاول توصلها وزيرة الخارجية هو ان السياسة الخارجية لبلادها كيحددها رئيس الحكومة وباللي التحالف مع بوديموس المساند للبوليساريو ما غادياش تأثر على هاد السياسة.
الموقف من الصحرا غادي يبقى كيف كان. مصدر مغربي قال ل”كود” باللي الرباط فصحراءها وما هامهاش واش مدريد غادية تبدل شي موقف ولا اللا “الاشتراكيون عندهم تقاليد معروفة فالسياسة الخارجية. اليوم ما كنظنش باللي غادي يتغير هاد الموقف. لكن حنا ما كيهمناش. هاد الشي كيهم مدريد. وعندنا ثقة فاللي الامور غادية تستمر كيف كانت”