قتل الكلاب الضالة نواحي كازا منوض روينة.. المشاهير وناس عاديين ساخطين على الوضع فمواقع التواصل -تصاور

السلطات في دار بوعزة دارت حملة لقتل الكلاب الضالة بعد شكايات تقدمو بيها بعض السكان لأنها كتشكل خطر عليهم وعلى الحيوانات ديالهم لي كيسترزقو منها وهي مصدر عيشهم.
عملية القتل تمات قدام أعين المواطنين لي عبرو عن غضبهم ورفضهم لهاد الطريقة الوحشية واعتابروها جريمة حيت هاد الكلاب لي قتلو بدم بارد بالبارود ملقحة ومخصية ومكتشكل حتى خطر نهائيا لا على الناس لا على الحيوانات.
الخبر انتقل لمواقع التواصل الاجتماعي وبزاف ديال الناس عبرو على سخطهم ورفضهم لهاد عملية القتل، وعبرات الشطاحة مايا عن فقصتها وبكات في الستوريات، وموراها الفنانة التشكيلية زينب بنيس كعات وعبرات حتى هي على الألم لي كتحس بيه، وبزاف ديال الناس انخارطو في حملة للتعريف بشنو واقع في دار بوعزة ويلقاو حل لوقف عملية قتل الكلاب.
بعض السكان نعسو في طوموبيلاتهم باش يحبسو المسؤولين من قتل الكلاب، ودارو هاشتاكَ “#قتلونا معاهم”.