شبكة ديال الزرامة تشدات ففرانسا.. كيزرمو فباريس ويبيعو فالمغرب

ذكرت صحيفة “Le Parisien” الفرنسية ان بوليس باريس فكك شبكة ديال الزرامة (السرقة بالنشل)، فاواخر اكتوبر اللي فات، ولقاو عند واحد من المشتبه فيهم فيشيي عامر معلومات على انواع الهواتف المسروقة واثمنتها.
هاد التليفونات كيديبلوكيوها، وكتباع، هي ومنتجات اخرى، فالمغرب من بعد ماكدوز من شركات ديال الاستراد والتصدير.
واضافت الصحيفة الفرنسية ان موظفين شركات الاستراد والتصدير كيدوزو السلعة المشفورة فالتسافيرات ديالهم بين المغرب وفرنسا.
هاد الموظفين كينقلو الهواتف، والطابليطات، واشياء اخرى لزعماء الشبكات فالمغرب اللي كيعاودو فيهم البيع بنص الثمن. وفالرجوع كينقلو معاهم الفلوس ليكيد اللي كيعطيوهم ل”المحاسب” اللي بدورو كيوزعهم على “المركزية”.
هاد الشبكة نشيطة بزاف، والحجة ان عند زرام واحد لقاو 58 هاتف و عشرات الريحات، وطابليطات، و”iPods”، وبزاطم Vuitton، ومگانات فاخرة، ومجوهرات.
ومؤخرا، تزادت السرقة فباريس بنسبة 12%، والأكثرية فوسائل النقل العمومي بحال الميترو، وعاد اغلبية الضحايا كيكونو توريست، وماكيخدوش الوقت يحطو بلانت.