تامر حسني تلفات به الوقت.. مراتو المغربية بسمة بوسيل مازال قالباها صباط مع المصرية مي عز الدين

المغنية المعتزلة بسمة بوسيل مازال قالباها صباط مع الممثلة المصرية مي عز الدين لي ديما كانت كتمثل مع راجلها المغني تامر حسني وكانت باغة تزوج بيه قبل ما يتعرف على بسمة.
الحرب الباردة ولات واضحة بيناتهم دابا، كل وحدة كتكوي من جهتها، وكاين حملة كبيرة على بسمة بوسيل واتهامات بأنها كتحكم في راجلها ومامخلياهش يخدم مع مي وهادشي كلو سبابو الغيرة.
التبركية لي جابت “كود” من مصدر مقرب من بسمة بوسيل أنها فعلا ماباغاش راجلها يدير معاها شي عمل سينمائي واخا النجاح والأرباح مضمونين، وفضلات توقف ليه في طريقو على أنه يخدم معاها حيت القلوب ماصافياش.
تامر حسني لي تلفات به الوقت، جاوب بطريقتو وكثر من التصاور مع مراتو فانستكرام باش يبين أنه معاها ومباغيش صداعات.