هشام التلمودي لي طير أغنية سعد لمجرد من اليوتوب: أنا لي رجعتها ليه بلا ريال بلا جوج -فيديو

قضية أغنية “سلام” ديال المغني سعد لمجرد مازال فيها القيل والقال وكل واحد كيعطي الرواية لي مسلكاه.
هشام التلمودي المغني والملحن لي شكا بيه عند اليوتوب بسبب حقوق الملكية وخلا الأغنية طير، قال أنه هو لي رجع الأغنية وماشي كيفما قالو ناس لمجرد.
وأكد التلمودي أن القضية تمت بلاما يشد لا ريال لا جوج، وأنه سيفط لليوتوب وتم الحظر بعدما حس أن مجهودو مشا ليه بدون أي رد اعتبار.
وطلب الفنان يكون هادشي لي وقع مع لمجرد فرصة باش يدويو على حقوق الملكية وكيفاش ممكن للفنان يحمي خدمتو قانونيا.
وكان سعد لمجرد كلا الدق ديال بصح بعدما طارت الأغنية من اليوتوب، وهادشي خلاه يتناقش مع محسن تيزاف عضو مجموعة الفناير لي مسؤول على اللحن.