ها شحال خاص الرجا يدفع باش يتفك مع كارتيرون

علمت “كود”، أن الرجاء البيضاوي كيقلب على تسوية بالتراضي مع المدرب الفرانساوي باتريس كارتيرون، باش ما تكون حتا متابعة من طرف الاتحاد الدولي لكرة القدم فيفا.
وكشف مصدر رجاوي، أن الرجا خاصو يدفع 140 مليون سنتيم باش يتفك رسميا مع المدرب كارتيرون، بعدما قرر الاستغناء عليه في أعقاب الهزيمة أمام يوسفية برشيد البارح السبت برسم مؤجل الدورة الثالثة من منافسات البطولة.
هاد المبلغ عبارة عن 3 اشهر، لي خاص يؤديها الرجاء البيضاوي لكارتيرون، بالإضافة إلى بعض المستحقات العالقة وتخص منح بعض المباريات.
مكتب الرجاء اتفق رسميا مع جمال السلامي باش يعوض كارتيرون بمساعدة يوسف السفري، اللي قبل يرجع للرجا من حديد.
وما شي بعيد يبدا السلامي خدمتو هاد السيمانة باش يحضر مزيان لإياب الديربي العربي اللي غادي يكون نهار 23 نونبر الجاري بملعب مركب محمد الخامس في الدار البيضاء ضمن مسابقة كأس محمد السادس للاندية الأبطال.