مدرب غلطة سراي دافع على بلهندة: حنا محتاجين لمناصرين ما شي متفرجين كيصفرو على اللعاب

فاتح تريم، مدرب غلطة سراي، دافع بشراسة على اللاعب يونس بلهندة، لي دخل ف ملاسنات أثناء تغييره ف ماتش ديال ريال مدريد نهار الثلاثاء، لي فات في دوري أبطال أوروبا.
مدرب غلطة سراي ما خلاش بلهندة بوحدو ف هاد المشكل، ودافع عليه بقوة، وگال ف تصريحات صحافية “انا ما عرفتش علاش الجماهير استفزت بلهندة وقامت بتلك الحركة. هادشي ما معمر وقع. حنا محتاجين لمناصرين ما شي متفرجين عاديين، وهاد المسألة لا يمكنها أن تصدر من محب وعاشق حقيقي للنادي. لعبنا امام ريال مدريد العملاق وكنا محتاجين للتشجيع والدعم ما شي لتصفار على اللعاب”.
هاد صافرات الاستهجان، هي لي خلات بلهندة يفقد السيطرة ويرد عليهم حتا هو بترديد عبارات مستفزة تجاه الجمهور.
ورغم دفاع فاتح تريم، إلا أن بلهندة مهدد بعقوبة من فرقتو بسبب سلوكه ويقدر يترتب عن ذلك تداعيات، لان المدرب تريم كايبغي بلهندة بزاف، وهو لي ما خلاهش يمشي من غلطة سراي التركي.