رسميا. المنتخب غادي يلعب مع ليبيا والجامعة كتستنا موافقة منتخب إفريقي

علمت “كود”، أن المنتخب المغربي غادي يلعب مع ليبيا رسميا في أكتوبر المقبل، استعداد الماتش ديال موريتانيا، لي غادي يكون في نونبر جاي.
خاليلوزيتش طلب يلعب مع ليبيا، لحقاش أسلوب هاد المنتخب قريب من الطريقة لي كايلعب بها منتخب موريتانبا، كما أن المدرب البوسني بغا يلعب بزاف ديال الماتشات باش يشوف كاع اللاعبين.
الجامعة توصلت رسميا بموافقة المنتخب الليبي باش يتلعب الماتش في الدار البيضاء أو مراكش.
المدرب البوسني وحيد خاليلوزيتش طلب ماتش 0خر ، لكن هاد المرة مع منتخب إفريقي قوي، باش يتمكن من معرفة مكامن القوة والضعف قبل ما يبدا الإقصائيات الإفريقية، المؤهلة إلى نهائيات كأس إفريقيا.
مصادر جامعية أكدت ل”كود”، أن خاليلوزيتش باغي يلعب مع منتخب قوي باش يوقف على مستوى كل لاعب خصوصا أن مباراتي بوركينافاسو والنيجر بيناتلو بزاف ديال الثغرات بالمنتخب الوطني.
هاداك شي علاش الجامعة راسلات بزاف ديال المنتخبات القوية بحال السنغال ونيجيريا والغابون وغانا ومازال كتستنا الجواب النهائي.
خاليلوزيتش دار جوج ماتشات مع المنتخب الوطني واحد تعادل فيه مع بوركيافاسو بواحد لواحد والثاني فاز فيه بواحد لزيرو مع النيجر وبجوجهم كان فيهم الاداء ضعيف.