وزراء وسياسيون ومشاهير حضرو لاوركسترا “سمفونيات” وماكاين غير النشاط

البارح كانت نايضة في حلبة سباق الخيل في كازا لي تم فيها احياء حفل ديال الأوركسترا الفيلهارمونية “سمفونيات” بحضور بزاف ديال المشاهير والوزاراء والسياسيين بحال وزير الداخلية السابق محمد حصاد، ورئيس الباطرونا صلاح الدين مزوار، ومولاي حفيظ العلمي، وزير الصناعة والاستثمار والتجارة والاقتصاد الرقمي، ورجل الأعمال نور الدين عيوش، وسيرج بيرديگو وزير السياحة السابق ورئيس الطائفة اليهودية بالمغرب، والمخرج المثير للجدل كمال هشكار.
هادو كاملين كيفما عاينات “كود” كانو گالسين حدا بعضياتهم في الجهة الخاصة بالضيوف وشدو الصف الأول، وتفاعلو مع الأغاني الثراتية المغربية لي غناتها كل من نبيلة معن، وسناء المرحاتي، ومحمد العسري ثم نجمة السهرة المغنية الاسرائيلية من أصول مغربية نيطع القايم.
وفي المشاهير لي كانوا گالسين فالسيكسيون vip كان صارم الفاسي الفهري مدير المركز السينمائي المغربي، والراقصة مايا، والمخرج أمير الرواني، والممثلة سامية أقريو.
الحفل جمع 32 عازف مغربي وأجنبي، وكان توم كوهين نجم الحفلة بالتفاعل ديالو مع الموسيقيين لي كانوا أكثر من رائعين.