بعدما هان المراة وگال بلاصتها فالكوزينة ..راديو مارس قررات توقيف عادل العوماري

راديو مارس، قررات اليوم الجمعة، توقف الصحافي عادل العوماري، بعد الصداع اللي ناض على ود الرد ديالو على مستمعة اسمها مريم ايت الحاج باسلوب ميزوجيني، قال ليها “وا بنت الحاج. سيري طيبي. سيري تفرجي فشوميشة، و بعدي من كورة وبعدي من المنتخب”.
ووقفات الإذاعة العوماري ثلاثة أيام، واخا اعتاذر مع هشام الخليفي، ولينو باكو، لي كيسيرو الإذاعة.
وقدمات "راديو مارس" في بيان نشراتو على موقعها الرسمي، اعتذار على هدرة وتكلاخ العوماري.
واضاف بيان "راديو مارس" أن الإذاعة مع المناصفة، وعطات مثال بالصحافية دنيا السراج، اللي كاينة في مصر لتغطية كأس امم إفريقيا.
دابا خاص الهاكا تحرك، وتعاقب حتى هي هاد “الصحافي”، وتبين للمغاربة ان بحال هاد التقليل من شان المرا وبحال هاد التكلاخ وهاد الميزوجينية غير مقبولين.